Paula Medín

Para outras páxinas con títulos homónimos véxase: Medín.

Paula Medín

Nome orixinal	Paula Medín López
Biografía
Nacemento	17 de xuño de 1984 ^(40 anos) Cambre
Outros nomes	Alevín
Altura	1,71 m
Peso	66 kg
Actividade
Ocupación	xogadora de rugby, xogadora de rugby a sete
Deporte	rugby
Posición de xogo	dianteira (3ª liña)
Membro do equipo deportivo	CRAT da Coruña
Participou en
2016	rugby de sete nos Jogos Olímpicos de Verão de 2016 ^(pt)

Paula Medín López, "Alevín", nada en Cambre o 17 de xuño de 1984,^[1] é unha fisioterapeuta^[2] e xogadora de rugby galega, olímpica no Río 2016.^[3]

Dianteira pertencente ao CRAT da Coruña e internacional coa Selección feminina de España de Rugby a 15 e Rugby a 7, foi campioa de Europa en 2010 en Estrasburgo, e participou nos Xogos Olímpicos do Río de Xaneiro do ano 2016.^[4][5]

Traxectoria

No CRAT

Paula Medín comezou a practicar rugby por influencia da súa irmá e dunha amiga cando estudaba no instituto. Xogadora do CRAT dende 2001, co club coruñés ten acadado o título de liga na División de Honra Feminina de Rugby na tempada 2014-15, batendo na final disputada en Xixón ó Getxo Rugby Taldea por 39 a 5. O CRAT viña de ser subcampión nas tempadas 2010-11, 2011-12 e 2013-14. Ós éxitos acadados na máxima competición nacional tamén se suman os obtidos a nivel galego, cos campionatos de liga galega de 2010, 2011, 2012, 2013, 2014 e 2015, e os títulos da Copa Xunta de 2010, 2011, 2012, 2013, 2014 e 2015. Na modalidade de rugby a 7 acadou o título das Series Nacionais en 2011.^[6]

Na selección de rugby a 15

Paula Medín disputou 44 encontros coa selección española. Paula debutou coa Selección feminina de rugby de España o 28 de abril de 2007 nun encontro do Campionato de Europa disputado no Central de Madrid fronte a Italia.

Paula participou nos campionatos europeos de 2007, 2008, 2009, 2010 e 2011. No torneo de 2010 disputado en Metz e Estrasburgo (Francia) Paula xogou tres encontros, incluído a final na que España acadou o título continental derrotando por 31 a 13 a Italia. Ó ano seguinte o Campionato de Europa disputouse en Galicia. Paula xogou tres encontros, incluída a final, que se disputou no Estadio Universitario de Elviña da Coruña, e na que España perdeu por 5 a 3 diante de Inglaterra.

En 2013 Paula xogou tres encontros clasificatorios para a Copa do Mundo Feminina de Rugby do ano seguinte, acadando tres vitorias e a clasificación. Na cita mundialista que tivo lugar en Marcoussis e París (Francia), a selección española rematou no noveno posto. Paula xogou cinco encontros, e foi a capitá do equipo no encontro disputado contra Casaquistán.

O último encontro xogado por Paula Medín coa selección española foi o 19 de decembro de 2015 contra Hong Kong. Aquel foi un encontro amigable de preparación para o Campionato de Europa que se disputará no outono de 2016, e que pode ser clasificatorio para a Copa do Mundo de 2017, o próximo obxectivo da xogadora galega. Nese encontro sumou dous dos cinco ensaios que ten anotado co equipo nacional.

Na selección de rugby a 7

Paula Medín debutou coa Selección feminina de rugby a 7 de España o 16 de xullo de 2011 no Campionato de Europa disputado en Bucarest. En decembro foi chamada de novo para formar parte do equipo que disputou o torneo de Dubái, que formaba parte da Challenge Cup. A partir de entón converteuse nunha xogadora habitual do equipo nacional de rugby a 7.

Participou nos torneos de Ameland e Moscova das series europeas de 2012 (4º e 2º posto) e a continuación debutou nas Series Mundiais Femininas de Rugby a 7 2012-13 participando nos torneos de Dubái e Ámsterdam. España rematou no 9º posto.

En 2013 disputou o torneo de Marbella pertencente ás Grand Prix Series europeas (3º posto), e a seguinte cita foi a Copa do Mundo de Rugby a 7 2013 que tivo lugar en Moscova. Alí a selección colleitou un 4º posto moi positivo.

Paula Medín estivo ausente da selección de rugby a 7 durante toda a tempada 2013-14, en parte pola cita mundialista da modalidade de rugby a XV que se disputou en 2014 pero sobre todo por unha grave lesión de xeonllo con rotura de ligamento cruzado anterior. As lesións nos xeonllos teñen afastado a Paula Medín dos terreos de xogo en varias ocasións.^[7]

Tralo mundial de rugby a 15, a volta á selección de rugby a 7 na tempada 2014-15 tiña un obxectivo claro, a clasificación para os Xogos Olímpicos de 2016, nos cales a modalidade reducida do rugby ía debutar. Nesa tempada participou nos torneos de Dubái, Sao Paulo, Atlanta, Langford, Londres e Ámsterdam das Series Mundiais 2014-15 (9º posto), nos torneos de Kazán e Brive das Grand Prix Series europeas 2015, e finalmente nun torneo de repesca en Lisboa para poder participar no preolímpico de Dublín de 2016. Antes dos preolímpico Paula disputou os torneos de Dubái, Sao Paulo, Atlanta e Langford das Series Mundiais 2015-16, e finalmente no preolímpico acadaron a vitoria e unha praza para participar nos Xogos Olímpicos.

Paula Medín foi unha das 12 xogadoras seleccionadas polo seleccionador José Antonio Barrio para disputar o torneo olímpico de Río de Janeiro no mes de agosto de 2016, no cal o equipo nacional acadou un diploma olímpico ó rematar na sétima posición. Este torneo foi a despedida de Paula Medín da Selección feminina de rugby a 7 de España.

Galería

• 
  Paula Medín placando a unha xogadora italiana ante a vista de Vanesa Rial.
• 
  Paula Medín, a primeira pola esquerda, antes dun encontro coa selección española.

Notas

1. Paula Medín López Arquivado 13 de setembro de 2019 en Wayback Machine. Comité Olímpico Español.
2. "CoFiGa felicita á fisioterapeuta Paula Medín …" Colexio Oficial de Fisioterapeutas de Galicia.
3. "Paula Medín ‘Alevín’: “El rugby es mi vida”" Arquivado 14 de agosto de 2016 en Wayback Machine. Wang Connection. Abril de 2015.
4. "Billete a Río 16 para Vanesa Rial y Paula Medín en rugby a 7" Arquivado 13 de setembro de 2019 en Wayback Machine. El Correo Gallego, 27/6/2016 (en castelán).
5. "Vanesa Rial e Paula Medín farán historia nos Xogos do Río" Arquivado 11 de setembro de 2016 en Wayback Machine. TVG, 20/7/2016.
6. Palmarés do CRAT Arquivado 13 de agosto de 2016 en Wayback Machine. (en castelán)
7. Prohibido hincar la rodilla, artigo de La Voz de Galicia. (en castelán)

Véxase tamén

Outros artigos

• Vanesa Rial

Ligazóns externas

• Fotografía de Paula Medín La Opinión Coruña.
• Torneos e alineacións das seleccións españolas de rugby tempada a tempada (en castelán)

---

Este artigo sobre deporte é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---