Uys Krige
| Biografía | |
|---|---|
| Nacemento | 4 de febreiro de 1910  Província do Cabo, Suráfrica (pt)  |
| Morte | 10 de agosto de 1987 (77 anos) Hermanus, Suráfrica (pt) |
| Causa da morte | doenza |
| Educación | Stellenbosch University Paul Roos Gymnasium (en) |
| Actividade | |
| Ocupación | lingüista, xornalista, poeta, tradutor, escritor |
| Pseudónimo literario | Arnoldus Retief |
| Carreira militar | |
| Rama militar | Brigadas Internacionais |
| Conflito | guerra civil española |
| Obra | |
| Arquivos en |
|
| Familia | |
| Nai | Sannie Uys |
| Descrito pola fonte | Africa: An Encyclopedic Reference, (vol:2) |
Uys Krige (nome cristianizado en Mattheus Uys Krige) nado o 4 de febreiro de 1910 e finado o 10 de agosto de 1987, foi un escritor, poeta, dramaturgo, tradutor, xogador de rugby, e correspondente de guerra surafricano. Na literatura afrikáans, Krige cóntase entre os Dertigers e segundo o seu amigo Jack Cope, unha excepción da súa xeración debido á súa hostilidade cara ao nacionalismo afrikáner extremo, o supremacismo branco e o seu papel na oposición interna ao apartheid.
Biografía
[editar | editar a fonte]Naceu en Bontebokskloof, preto de Swellendam, na Provincia do Cabo. Cursou estudos superiores na Universidade de Stellenbosch. Desde 1931 até 1935 viviu en Francia e España, onde aprendeu a falar francés e castelán con fluidez. Durante esta época, Krige xogou tamén nun equipo de rugby de Toulon, no sur de Francia. En Barcelona descubriuse por primeira vez como prosista e en Madrid fixo as primeiras incursións no teatro.
Ao seu regreso a Suráfrica en 1935, comezou a súa carreira de escritor como correspondente do Rand Daily Mail. Traballou en Die Vaderland por un curto período antes de mudarse a Cidade do Cabo a finais de 1936 e ser empregado de Die Suiderstem. Coñeceu a Lydia Lindeque, unha prometedora actriz local, mentres estaba en Johannesburgo, e casaron o 27 de xaneiro de 1937. Krige observou a política internacional con crecente preocupación desde a súa casa.[1]
O tempo de Krige no estranxeiro fixo que coñecese de primeira man a situación europea. De volta a Suráfrica, seguiu ansioso as noticias e discerniu a volátil situación en Europa. Inicialmente, opúxose apaixonadamente á participación de Suráfrica noutra guerra na que morrerían decenas de miles de surafricanos e ademais a poboación tería novos motivos para "agradecer" a Gran Bretaña e o colonialismo.
A guerra civil española alertou a Krige dos perigos que supoñía o fascismo, e simpatizaba moito coa poboación española. Tomou parte na guerra loitando no bando republicano.[2] A través de España, viu que o fascismo podía levar á destrución dos valores occidentais que o futuro da democracia en Europa estaba sendo ameazado. Esta foi unha das súas principais motivacións para, despois de apoiar o bando republicano na guerra civil, involucrarse tamén na segunda guerra mundial.[3]
Mentres en Suráfrica a prensa afrikáans describiu a Franco como un heroe nacionalista, Krige escribiu sobre o conflito sinalando os perigos do fascismo. En 1937, tamén pasou a formar parte dun comité que recadaba cartos para axudar aos nenos españois. A súa primeira filla, María-Eulalia, naceu o día de Nadal dese ano. Os esforzos de Krige por concienciar á poboación surafricana foron atendidos na súa maioría con apatía. Con todo, máis de dous millóns de surafricanos, de todas as clases sociais, participaron na segunda guerra mundial.[4] A radio de propaganda nazi "Zeesan" tamén emitía en afrikáans e a súa oposición ao goberno e á poboación recordou a crueldade británica durante a guerra anglo-bóer. Tamén se deron instrucións sobre como a poboación podía sabotar o esforzo bélico e así axudar a Alemaña.
Durante a segunda guerra mundial, Uys Krige foi correspondente de guerra do exército surafricano en África do Norte. Capturado en 1941, foi enviado a Italia, onde estivo internado durante dous anos nun campo de prisioneiros de guerra, do que escapou en setembro de 1943; fuxido nos montes aínda ocupados polos nazis, foi axudado por campesiños italianos, o que contou en The Way Out. Regresou a Suráfrica en 1946.
Como escritor e poeta, Krige foi extremadamente versátil; a súa obra inclúe novelas, contos, poemas e obras de teatro, tanto en afrikáans como en inglés. En 1968 coeditou con Jack Cope “The Penguin Book of South African Verse”.
Obra
[editar | editar a fonte]Krige traduciu ao afrikáans a maior parte da obra de William Shakespeare. Tamén traduciu do castelán obras de Federico García Lorca, Pablo Neruda e Lope de Vega, e de Baudelaire, François Villon e Paul Éluard do francés.
O seu irmán foi o pintor e debuxante François Krige [5]. As viaxes de ambos a España foron plasmadas no libro de Uys "Sol y Sombra" para o que François realizou provocativas ilustracións.[6]
Todas as publicacións atópanse editadas en afrikáans excepto onde se indica outra cousa.
Coleccións de poemas:
[editar | editar a fonte]- Kentering (Cambio), 1935.
- Rooidag (Día vermello), 1940.
- Oorlogsgedigte (Poemas de guerra), 1942.
- Hart sonder hawe (Corazón sen porto), 1949.
- Ballade van die groot begeer (Balada do gran desexo), 1960.
- Vooraand (A tarde anterior), 1964.
Novelas:
[editar | editar a fonte]- Die palmboom (A palmeira), 1940.
- (en inglés) The dream and the desert (O soño e o deserto), 1953.
Libros de viaxe e correspondencia de guerra:
[editar | editar a fonte]- (en inglés) The way out (O camiño de saída), 1946.
- Sol y sombra, 1948.
- Ver in die wêreld (Lonxe do mundo), 1951.
- Sout van die aarde (O sal da terra), 1961.
Obras de teatro:
[editar | editar a fonte]- Magdalena Retief, 1938.
- Die goue kring (O círculo dourado), 1956.
Obras nun acto:
[editar | editar a fonte]- Die wit muur (O muro branco), 1940.
- Alle paaie gaan na Rome (Todos os camiños levan a Roma), 1949.
- Die sluipskutter, 1951 (traducida ao inglés polo propio autor como "The sniper" -O francotirador- en 1962).
Notas
[editar | editar a fonte]- ↑ J.C. Kannemeyer. "Die goue seun. Die lewe en werk van Uys Krige". DBNL (en neerlandés). p. 286-288. Consultado o 2022-03-13.
- ↑ "Mattheus Uys Krige ; South African History Online". www.sahistory.org.za. Consultado o 2022-03-13.
- ↑ DBNL. "J.C. Kannemeyer, Die goue seun. Die lewe en werk van Uys Krige · dbnl". DBNL (en neerlandés). pp. 286, 288. Consultado o 2022-03-13.
- ↑ Jallow, Baba. "Leonard Thompson - A History of South Africa" (en inglés).
- ↑ "François Krige". www.artnet.de. Consultado o 13 de marzo de 2022.
- ↑ Schoeman, Chris (2017-05-18). The Historical Overberg: Traces of the Past in South Africa’s Southernmost Region (en inglés). Penguin Random House South Africa. ISBN 978-1-77609-073-0.
Véxase tamén
[editar | editar a fonte] |
Wikimedia Commons ten máis contidos multimedia na categoría: Uys Krige |
Bibliografía
[editar | editar a fonte]- Botha, Danie (2006). Voetligte en applous!: Die beginjare van die Afrikaanse beroepstoneel (en afrikaans). Pretoria: Protea Boekhuis. ISBN 978-1-86919-090-3-.
- Cope, Jack (1982). The Adversary Within, Dissident Writers in Afrikaans. Cidade do Cabo: David Philip. ISBN 978-0-90839-659-7.
- Coullie, Judith Lütge; Lyle, Anna Campbell; Campbell, Teresa (2011). Remembering Roy Campbell: The Memoirs of his Daughters Anna and Tess. Hamden, CT: Winged Lion Press. ISBN 978-1-93629-404-6.