Կարին Շուբերտ

Կարին Շուբերտ գերմ.՝ Karin Schubert
Ծնվել է	նոյեմբերի 26, 1944(1944-11-26)[1][2] (79 տարեկան)
Ծննդավայր	Համբուրգ, Նացիստական Գերմանիա
Քաղաքացիություն	Գերմանիա և  Իտալիա
Մասնագիտություն	պոռնոգրաֆիկ դերասան, կինոդերասանուհի և մոդել
Համատեղ ապրող(ներ)	Giacomo Agostini?

Կարին Շուբերտ (գերմաներեն՝ Karin Schubert, ամբողջ անունը՝ Կարին Յոհաննա Շուբերտ (Karin Johanna Schubert, նոյեմբերի 26, 1944(1944-11-26)^[1][2], Համբուրգ, Նացիստական Գերմանիա), գերմանացի կինոդերասանուհի և մոդել, ով հիմնականում նկարահանվել է իտալական ֆիլմերում։ Երեսուն տարեկանում սկսել է նկարահանվել էրոտիկ, իսկ 1980-ական թվականների կեսերից՝ պոռնոգրաֆիական ֆիլմերում։

Կենսագրությունը

Կարին Շուբերտը ծնվել է Համբուրգում։ Երիտասարդ տարիներին իր կապտաչյա շիկահերի արտաքինը և 170 սմ հասակը թույլ էին տալիս, որպեսզի նա հանդես գար որպես մոդել։ Նա լուսանկարվում էր զանազան ամսագրերի համար և նկարահանվում գովազդային հոլովակներում։ Այդ տարիներին ամուսնացել էր Opel-ի ներկայացուցչի հետ և ունեցել մեկ որդի։ 1960-ական թվականների կեսերից, դերասանական կարիերա ստեղծելու նպատակով տեղափոխվել է Իտալիա և նկարահանվել իտալական մարտաֆիլմերում։

Կարին Շուբերտի մասնակցությամբ առավել հաջողված ֆիլմերից էին Ժերար Ուրիի «Վեհանձնության մոլուցք» (1971թ.) կինոնկարը` Լուի դը Ֆյունեսի, Իվ Մոնտանի և Ալիս Սափրիչի մասնակցությամբ, Էդվարդ Դմիտրիկի «Կապույտ մորուքը» (1972թ.) կինոնկարը` Ռիչարդ Բարթոնի, Ռաքել Ուելչի և Վիրնա Լիզիի մասնակցությամբ, Իվ Բուասսեի «Առևանգում Փարիզում» (1972թ.) կինոնկարը` Ժան-Լուի Տրենտինյանի, Միշել Պիկոլիի և Ջան Մարիա Վոլոնտեի մասնակցությամբ, ինչպես նաև Բրունո Կորբուչչիի «Երեք հրացանակիրները Վայրի Արևմուտքում» (1973թ.) կինոնկարը։ Հետագայում նա սկսեց նկարահանվել էրոտիկ կինոկատակերգություններում, որոնցից առավելապես հայտնի էր «Ուբալդա. Մերկ և կրակոտ» (1972թ.) կինոնկարը` Էդվիժ Ֆենեկի մասնակցությամբ։

Կարին Շուբերտի միամիտ և դեպի իրեն ձգող արտաքինը անտարբեր չի թողել ռեժիսոր Ջո Դ'Ամատոյին, ով նրան տարավ էրոտիկ կինոյի նկարահանման հրապարակ։ Այդ ժանրի առավել հայտնի ֆիլմերից էին «Սև Էմմանուելը» (1975թ.), «Բժշկուհին սավանների տակ» (1976թ.) և «Սև Էմմանուել. Աշխարհի շուրջը» (1977թ.) կինոնկարները, որտեղ նրա խաղընկերուհին Լաուրա Գեմսերն էր։

1985 թվականից Կարին Շուբերտը անցում կատարեց դեպի պոռնոգրաֆիա` նկարահանվելով և ֆիլմերում, և ամսագրերի համար։ Դրա պատճառը ֆինանսական դժվարություններն էին, որոնք կապված էին որդուն թմրամոլությունից բուժելու ծախսերի հետ։ Որդին հաճախ էր նրան ծեծում։ Հետագայում, Կարին Շուբերտը հեռուստատեսությամբ դատապարտել էր այն ամենը, ինչի միջով նա անցել էր` պոռնոաստղ դառնալու ճանապարհին։ Նա կնքել էր իր համար բավականին շահավետ պայմանագիր։ Բացի ամենամյա 180 000 գերմանական մարկ հոնորարից, նա հասել էր նրան, որ այդ ֆիլմերում պետք է բացառվեին զոոֆիլիայի և անալային սեքսի սյուժեները, պահանջելով նաև, որպեսզի իր զուգընկերները լինեին միայն սպիտակամորթներ։ Հիմնականում նա նկարահանվում էր իտալական պոռնոֆիլմերում։ 1994 թվականին, կապված տարիքի հետ, նա լքեց պոռնոարդյունաբերությունը` նկարահանվելով մոտ 24 ֆիլմերում և աշխատանքի անցավ հեռախոսային սեքս-ծառայությունում։

1994 թվականի սեպտեմբերի 1-ին, միայնությունից և աղքատությունից ընկճված լինելու արդյունքում, Կարին Շուբերտը փորձել է ինքնասպան լինել` ընդունելով բարբիտուրատներ և օղի, սակայն ժամանակին նրան նկատել և փրկել են հարևանները։ Հեռուստատեսությամբ իր հարցազրույցի ժամանակ նա հայտարարել է, որ 11 տարեկանում իր հոր կողմից ենթարկվել է սեռական ոտնձգությունների և նշել. «Ես չունեմ ընտանիք, ընկերներ, փող և ապագա։ Ես ցանկանում էի մեռնել, քանի որ իմ կյանքն արդեն կործանված է և ես բաց եմ թողել ամեն ինչ։ Մարդկանց համար, ես պարզապես պոռնիկ եմ»։ 1996 թվականին նա երկրորդ անգամ է ինքնասպանության փորձ կատարել` այս անգամ թունավորվելով ավտոմեքենայի շմոլ գազով։ Արդյունքում` կրկին նրան փրկել են, որից հետո, մի քանի շաբաթ գտնվել է առողջական ծանր վիճակում։

Ներկայումս Կարին Շուբերտը իր շների հետ միասին բնակվում է Մանցիանա համայնքում։

Մասնակի ֆիլմագրությունը

Թվական	Անվանում	Բնօրինակ անվանում	Կերպար
1968	Ես քեզ սիրում եմ	Io ti amo	-
1970	Ծաղրուծանակ	Satiricosissimo	շիկահեր աղջիկ
1970	Գործընկերները	Vamos a matar, compañeros	Զաիրա
1970	Ամուսնացած քահանան	Il prete sposato	-
1971	Վախի պաղ աչքերը	Gli occhi freddi della paura	Ակումբի դերասանուհի
1971	Սարսափի ժամերը	Ore di terrore	Վերա
1971	Վեհանձնության մոլուցք	La folie des grandeurs	թագուհի Մարիա Աննա Պֆալց
1971	Ներեցեք, նա վճարու՞մ է հարկերը	Scusi, ma lei le paga le tasse?	Ֆաբրիցիա
1972	Կապույտ մորուքը	Bluebeard	Գրետա
1972	Առևանգում Փարիզում	L'attentat	Սաբինա
1972	Ուբալդա. Մերկ և կրակոտ	Quel gran pezzo della Ubalda tutta nuda e tutta calda	Ֆիամմա
1972	Արգելված պատմվածքներ` առանց շորերի և կապիչների	Racconti proibiti... di niente vestiti	-
1973	Պատիժ	La Punition	Բրիտ
1973	Երեք հրացանակիրները Վայրի Արևմուտքում	Tutti per uno... botte per tutti	-
1974	Աստված իմ, որքան եմ ես ցածրացել	Mio Dio, come sono caduta in basso!	Էվելին
1974	Վախի տունը	La casa della paura	Մարիա
1974	Կործանվածը	L'ammazzatina	Եվա
1975	Սև սիրամարգը	Il pavone nero	Լաուրա
1975	Սև Էմմանուելը	Emanuelle nera	Էնն Դանիելի
1976	Բժշկուհին սավանների տակ	La dottoressa sotto il lenzuolo	Լաուրա Բոնետի
1976	Երբ ամուսինները գնում են պատերազմ	Cuando los maridos se iban a la guerra	Բեատրիս
1976	Մահը հետապնդում է Մոնիկային	La muerte ronda a Mónica	Ելենա
1976	Ձվածեղ իտալական ձևով	Frittata all'italiana	-
1977	Սև Էմմանուել. Աշխարհի շուրջը	Emanuelle - Perché violenza alle donne?	Կորա Նորման
1979	Բուժքույրը զինվորական հիվանդասենյակում	L'infermiera nella corsia dei militari	Եվա
1979	Յուրահատուկ կինը	Une femme spéciale	Յասմինա
1983	Սև Վեներան	Black Venus	Մարիա
1984	Հաննա Դ. - Աղջիկը Վոնդել պուրակից	Hanna D. - La ragazza del Vondel Park	Հաննայի մայրը
1984	Հովազների ջոկատը	Panther Squad	Բարբարա
1987	Բոլորը ցանկանում են Կարինին	Altri desideri di Karin	-
1987	Մարինա. Կրակոտ հեշտամոլը	Il vizio nel ventre	-
1993	Կարմիր Գլխարկի էրոտիկ ճամփորդությունները	Le avventure erotix di Cappuccetto Rosso	տատիկ
1993	Երեք խոզուկները	Le tre porcelline	մայր

Ծանոթագրություններ

1. Internet Movie Database — 1990.
2. filmportal.de — 2005.

Վիքիպահեստն ունի նյութեր, որոնք վերաբերում են «Կարին Շուբերտ» հոդվածին։