Մանդակինի

Մանդակինի հինդի՝ मन्दाकिनी անգլ.՝ Mandakini
Ծնվել է	հուլիսի 30, 1969(1969-07-30)[1] (55 տարեկան)
Ծննդավայր	Մերատ, Ուտար Պրադեշ, Հնդկաստան
Քաղաքացիություն	Հնդկաստան
Մասնագիտություն	դերասանուհի

Մանդակինի (հինդի` मन्दाकिनी, անգլ.` Mandakini, իրական անունը՝ Յասմին Ջոզեֆ, ծնվ. 1969 թ. հունվարի 7, այլ աղբյուրներում ` 1963 թ. հուլիսի 30, նշվում են նաև ծննդյան 1966 և 1967 թվականները, Միրութ, Հնդկաստան), հնդկական կինոյի դերասանուհի։

Կենսագրություն

Մանդակինին կիսով չափ հնդկուհի է, կիսով չափ անգլուհի։ Նրա հայրը Հնդկաստանում ծնված անգլիացի կաթոլիկ է, իսկ մայրը` իսլամ դավանող հնդկուհի։ Մանդակինին ուներ մեկ քույր և մեկ եղբայր։ Իր ծննդավայրում ավարտել է օրիորդաց միջնակարգ դպրոցը և անգլիական քոլեջ։ Մանկությունից երազել է դերասանուհի դառնալու մասին։ Այդ նպատակով 1983 թվականին մեկնել է Բոմբեյ` կինեմատոգրաֆիայի ինստիտուտ ընդունվելու համար։ Որպես մոդել մասնակցել է ֆոտոսեսիաների և հաղթել համահնդկական գեղեցկության մրցույթում, որի արդյունքում էլ նրան նկատել են կինոգործիչները։

Նրա կինոդեբյուտը կայացել է 1985 թվականին՝ Ռաջ Կապուրի «Գանգե՛ս, քո ջրերը պղտորվել են» կինոնկարում, որտեղ նրա խաղընկերը Ռաջիվ Կապուրն էր։ Ռաջ Կապուրը սկսնակ դերասանուհուն ընտրել էր բազմաթիվ թեկնածուների միջից և նրան տվել Մանդակինի բեմական կեղծանունը, որն ըստ հինդուիզմի` երկնքում և երկրի վրա հոսող սրբազան Գանգես գետի անվանումներից մեկն էր։ Բացի այդ Մանդակինի անունը կրում էր Դադասահեբ Փհալկեի դուստրը, ով հնդկական համր կինոյի առաջին դերասանուհին էր։ Մանդակինիի կինոդեբյուտը հաջողված էր։ Ֆիլմն ունեցավ հսկայական հաջողություն և ճանաչում բերեց դերասանուհուն։ Այդ դերի համար նա ներկայացվեց Filmfare Awards-ի` կանացի լավագույն դերի համար։

Հետագայում Մանդակինին նկարահանվեց ավելի քան 40 կինոնկարներում ` ինչպես գլխավոր, այնպես էլ երկրորդական կամ էպիզոդիկ դերերում։ Նրա խաղընկերներից են եղել Միթհուն Չակրաբորտին, Ջիտենդրան, Գովինդան, Գուլշան Գրովերը և այլք։ Մանդակինին նկարահանվել է «Պարի՛ր, պարի՛ր» (1987 թ.), «Սիրի՛ր և հավատա՛» (1987 թ.), «Կոմանդոս» (1988 թ.), «Երեք ընկեր» (1988 թ.), «Միայնություն» (1989 թ.), «Թշնամին» (1990 թ.) և այլ ֆիլմերում։ 1996 թվականից Մանդակինին այլևս չի նկարահանվում, սակայն մասնակցում է զանազան շոուների և հանդես գալիս որպես երգչուհի։

Անձնական կյանքը

1990 թվականին Մանդակինին ամուսնացել է Դալայ-լամայի հետևորդ, տիբեթյան բժշկությամբ զբաղվող բժշկի հետ։ Նրանք ունեն երկու երեխա՝ մեկ տղա և մեկ աղջիկ։ Ապրում են Մումբայում, որտեղ Մանդակինին ամուսնու հետ բացել է յոգայի դպրոց։ 2010 թվականին, նա ամուսնու հետ միասին թողարկել է «Կորուսյալ երկիրը» կինոնկարը։

Ֆիլմագրության ընտրանին

Թվական	Անվանում	Բնօրինակ անվանում	Կերպար
1985	Գանգես, քո ջրերը պղտորվել են	Ram Teri Ganga Maili	Գանգա Սինգհ
1985	Մի ափից` մյուսը	Aar Paar	-
1986	Սիրո ցանցը	Jaal	Մադհու
1986	Աստվածուհիներ	Mazloom	Մինա
1986	Ջիվա	Jeeva	-
1986	Կրակ ու բոց	Aag Aur Shola	Ուշա
1987	Սիրիր և հավատա	Pyaar Karke Dekho	Ուրվաշի
1987	Պարիր, պարիր	Dance Dance	Ջանիտա
1987	Հատուցում որոնելիս	Hawalaat	Լիլա
1987	Պատվի պարտքը	Param Dharam	Բիջլի
1987	Ամեն մեկին` իրենը	Apne Apne	Իլա
1988	Կոմանդոս	Commando	Աշա Մալհոտրա
1988	Այրող կիրք	Tezaab	Նիկիտա
1988	Բոցավառվող կրակի մեջ	Agnee	Այուշի
1988	Երեք ընկեր	Jeete Hain Shaan Se	Ջուլիա
1989	Վերջին խաղը	Aakhri Baazi	Ռիտա
1989	Միայնություն	Jung Baaz	Սանգիտա Մաթհուր
1989	Արյունոտ հաշիվ	Hisaab Khoon Ka	Պրիտ Կաուշալ
1989	Հայրենիքի թշնամին	Desh Ke Dushman	Անիտա Մադան
1989	Ճակատամարտ	Ladaai	Գիտա Վերմա
1989	Զոհ` հանուն սիրո	Pyar Ke Naam Qurbaan	Գաուրի
1990	Սիրիր և հավատա	Naya Khoon	դոկ. Սիմա
1990	Փայլ	Shandaar	Անիտա Չաուրասիա
1990	Թշնամին	Dushman	Լաքշմի
1990	Օձը	Sheshnaag	-
1992	Պարիր, Գովինդա, պարիր	Naach Govinda Naach	-

Ծանոթագրություններ

1. ČSFD (չեխերեն) — 2001.

Վիքիպահեստն ունի նյութեր, որոնք վերաբերում են «Մանդակինի» հոդվածին։