C. Aubrey Smith

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

C. Aubrey Smith
C. Aubrey Smith en una imachen de 1895.
Información personal
Nombre real	Charles Aubrey Smith
Calendata naiximiento:	21 de chulio de 1863
Puesto naiximiento:	Londres (Anglaterra, Reino Uniu)
Calendata muerte:	20 d'aviento de 1948
Puesto muerte:	Beverly Hills (California, Estaus Unius)
Enterreco	Cenisas enterradas en o cementerio de Sant Leonardo d'Aldrington (Hove, Sussex)
Ocupación:	Actor Chugador de cricket
Alma Máter	St John's College (Universidat de Cambridge)
Pai	Charles John Smith
Mai	Sarah Ann Clode
Conchuche:	Isabella Wood (1896-)
Fillos:	Honor

Charles Aubrey Smith, mas conoixiu como C. Aubrey Smith estió un chugador de cricket y actor britanico con una destacada carrera mesmo en l'ambito de l'esporte que en o d'o teatro y lo cine, mas que mas en o cine estausunidense. Heba naixiu de Londres (Anglaterra, Reino Uniu) o 21 de chulio de 1863 y morió en a suya residencia en Beverly Hills (California, Estaus Unius) o 20 d'aviento de 1948 por pneumonía, estando incinerau, encara que cumplindo con a suya zaguera voluntad as suyas cenisas s'enterroron en o cementerio de Sant Leonardo d'Aldrington (Hove, Sussex), en a tumba de su mai.

Educau en o St John's College d'a Universidat de Cambridge, estió buscador d'oro en Sudafrica, a on tenió una pneumonía y los medicos lo declaroron erroniament muerto.

Como chugador de cricket, chugó en primeras en a suya Universidat y en o Sussex County Cricket Club, plegando mesmo a estar capitán d'a selección anglesa de cricket (encara que denguno no consideró en ixas envueltas que se tractase d'una selección oficial). Mientres a suya estancia como actor en Estaus Unius fundó lo Hollywood Cricket Club en Los Angeles d'o cual n'estioron miembros atros actors britanicos residents en Los Angeles, como David Niven, Laurence Olivier, Nigel Bruce (qui n'estió lo capitán), Leslie Howard y Boris Karloff.

Como actor, encomenzó la suya carrera en os teatros de Londres en 1895, continando-la mientres as primeras cintas de cine mudo en o cine britanico dica que trescruzó l'Atlantico ta treballar en o cine estausunidense, a on desembolicó la suya carrera interpretativa, estando amás o representant "oficioso" d'os actors britanicos en o cine de Hollywood, en o que lo critico Sheridan Morley calificó como lo Hollywood Raj.^[1] Mientres a suya carrera treballó con actrices como Greta Garbo, Elizabeth Taylor u Vivien Leigh, y con actorcs como Clark Gable, Laurence Olivier, Ronald Colman, Maurice Chevalier u Gary Cooper.

Premios

O 2 d'agosto de 1960, con caracter postumo, se li adhibió una estrela a lo Paseyo d'a Fama de Hollywood, estando a suya estrela situada en o 6327 de Hollywood Boulevard d'a ciudat de Los Angeles.^[2]