Terra Lliure

Terra Lliure
Pintada en sofitu de Terra Lliure
Operacional	1978 - 1991
Oxetivos	Creación d'un Estáu independiente en Cataluña.
Rexones d'aición	Cataluña
Ideoloxía	Estrema esquierda, independentismu catalán
Brazu políticu	Moviment de Defensa de la Terra (MDT)
Notes	Tres la so disolución los sos dirixentes y militantes ingresaron en Esquerra Republicana de Cataluña.
[editar datos en Wikidata]

Terra Lliure (Tierra Llibre n'asturianu) foi'l nome en catalán d'una organización terrorista d'ideoloxía independentista catalana y d'estrema esquierda fundada en 1978, autodisuelta en 1991. Cometió más de 200 atentaos, que'l so balance xubió a 5 víctimes mortales (4 d'elles miembros de la organización) y delles decenes de firíos. Mientres la so esistencia, les Fuercies de Seguridá del Estáu llegaron a detener a 300 persones venceyaes a la organización. Terra Lliure autodisolvióse en 1991, abandonando la llucha armada. Dalgunos de los sos dirixentes y militantes ingresaron darréu n'Esquerra Republicana de Catalunya (ERC), que-yos desixó l'arrenunciu esplícitu a la violencia como condición sine qua non pal so ingresu.^[1] Los presos de la organización foron saliendo de la cárcel en siendo indultaos o cumplir conderga. En 1996 yá nun quedaba nengún miembru de Terra Lliure en prisión.

Fonderada

Dempués de la muerte del dictador Francisco Franco en 1975 dio empiezu la transición española a la democracia. En 1977, el presidente Josep Tarradellas (nel exiliu) volvió a Cataluña y la Generalitat foi restablecida. Siguiendo l'aprobación de la Constitución española de 1978, en 1979 aprobóse l'estatutu d'autonomía de Cataluña, per aciu del qu'esti territoriu constituyóse como comunidá autónoma.

Non satisfechos con aquel nivel d'autonomía, delles organizaciones reactivaron los pidimientos de completa independencia pa Cataluña. Esa demanda tuviera presente dende entamos del sieglu XX, pero dempués de la dictadura ganó mayor soporte ente la sociedá catalana. Esto llevaría a ciertos sectores independentistes a usar la violencia p'algamar esa meta.

Historia

Formación y primeros atentaos

Terra Lliure diose a conocer oficialmente nun partíu de fútbol nel Camp Nou de Barcelona'l 23 de xunu de 1981, nel marcu de la campaña Som una Nació (Somos una Nación). La primer Asamblea de Terra Lliure celebróse nel sur de Francia. La mayoría de los sos miembros proveníen del Exèrcit Popular Català (EPOCA) o d'organizaciones como'l Front d'Alliberament Català (FAC) y el Partit Socialista d'Alliberament Nacional (PSAN).

Nel so primer documentu públicu, que'l so títulu ye "Crida de Terra Lliure" (Llamada de Terra Lliure), definiéronse a sigo mesmos como una "organización revolucionaria que llucha pola independencia total de los Países Catalanes" y faen un llamamientu a la "llucha escontra'l procesu de destrucción sistemática a que ta sometida la nuesa nación", destrucción que concreta en dellos puntos, el primeru de los cualos refierse a la "destrucción política que supón la separación de los Países Catalanes en tres rexones autónomes con llingües y símbolos distintos, instituciones distintes...". El documentu, fecháu nos Països Catalans el 24 de xunu de 1981, termina con un llamamientu: Visca la Terra! Independència o mort! Visca la lluita armada! Una sola nació, Països Catalans! (¡Viva la Tierra! ¡Independencia o muerte! ¡Viva la llucha armada! Una sola nación, ¡Países Catalanes!).

Unu de los primeros dirixentes de Terra Lliure foi Josep de Calassanç Serra, alies Cala, fíu del historiador Josep Calassanç Serra i Ràfols y hermanu d'Eva Serra y Blanca Serra, dambes venceyaes entós al grupu Independentistes dels Països Catalans (IPC). Cala foi espulsáu de Terra Lliure en 1983.^[2]

El 26 de xineru de 1979, el miembru de la organización Martí Marcó, de 19 años d'edá, morrió d'unos disparos al tratar de fuxir de la Policía Nacional, y pocu dempués muerre tamién Fèlix Goñi Bruc, al españa-y la bomba que taba manipoliando.

Secuestru y atentáu escontra Federico Jiménez Losantos

El 21 de mayu de 1981 dos miembros de Terra Lliure secuestraron a Federico Jiménez Losantos, entós profesor del institutu Puig Castellar de Santa Coloma de Gramenet y a otra profesora del centru. Jiménez Losantos convirtiérase n'oxetivu de los terroristes por promover el llamáu Manifiestu de los 2.300, robláu por intelectuales y profesionales, que la so llista completa nunca se fixo pública, nel que se denunciaba la situación de "discriminación llingüística" que, según los firmantes, carecíen los castellanoparlantes en Cataluña, y denunciaba la obligatoriedá d'estudiar en catalán. Tres el secuestru, dambos profesores foron treslladaos a un pinar cercanu a Santa Coloma de Gramenet, onde foron arreyaos a un árbol. De siguío dispararon sobre Jiménez Losantos nuna pierna, non ensin enantes desplica-y que l'atentáu terrorista yera de "represalia" por ser un "enemigu de los Países Catalanes". Dende entós abasna una visible coxera.^[3] L'autor del disparu foi Pere Bascompte, que sería condergáu en xunetu de 1983 por esti fechu a 9 años de cárcel, de los que namái cumplió 4 meses al salir de prisión aprovechando un error alministrativu y fuxir al estranxeru hasta que prescribió'l delitu^[4]

Unu de los fundadores de Terra Lliure Jaume Fernández Calvet xustificó l'atentáu años dempués como una aición pa frenar una «maniobra lerrouxista» y tamién manifestó entós el so prestu porque Jiménez Losantos yá nun tuviera en Cataluña.^[2]

Muerte y detención d'activistes: 1984-1989

Ente 1981 y 1984 Terra Lliure trató de ganase la solidaridá de les clases trabayadores de Cataluña y de desempeñar un rol importante na sociedá y la política catalana. Mientres esti periodu la organización atentó escontra repetidores de televisión, intereses económicos franceses o españoles, y escontra la Policía y l'Exércitu español.

En 1984 morrió Toni Villaescusa mientres remanaba un artefautu esplosivu n'Alzira (Valencia) y n'avientu de 1985, Quim Sánchez. En febreru de 1984 la organización llanza una revista denominada Alerta (Sollerta), que sumió más tarde.

Ente 1984 y 1989 dellos activistes de Terra Lliure foron arrestaos, anque'l grupu caltuvo bona parte de la so estructura y capacidá operativa llegando a desenvolver dos grupos allegaos: los Comitès de Solidaritat amb els Patriotes Catalans (CSPC) y el Moviment de Defensa de la Terra (MDT).

En 1987 l'españíu d'una bomba asitiada por Terra Liure nel Xulgáu de Les Borges Blanques (Lleida) provocó la muerte a una vecina del edificiu, Emilia Aldomà. Esti fechu replantegó les aiciones de la organización.

Primeros abandonos

Na III Asamblea de Terra Lliure, celebrada nel branu de 1988, la organización aprobó un ambiciosu plan pa los Xuegos Olímpicos de Barcelona 1992, magar qu'una parte de los miembros empezó a desmarcase y tres 1991 una fraición (la IV Asemblea) abandonó la llucha armada. Asina lo confirmaría Pere Bascompte, unu de los sos fundadores, pocu dempués nos medios de comunicación.

Este foi'l comunicáu d'abandonu de les armes per parte de la IV Asemblea de Terra Lliure:

Terra Lliure, organización militar que llucha pola independencia total de Cataluña, diríxise per última vegada al pueblu catalán pa comunicar los siguientes alcuerdos: vista la bona marcha de les negociaciones polítiques establecíes ente los dirixentes independentistes procedentes de Catalunya Lliure y d'ERC, comprobando'l sentíu de fonda responsabilidá política d'ERC nel procesu escontra la independencia y considerando la demanda fecha pola direición d'ERC na ronda de conversaciones, la direición executiva de Terra Lliure alcordó, cola consulta y l'alcuerdu previos con cada unu/a de los sos militantes y collaboradores/as, reconsiderar la posición inicial de tregua unillateral indefinida y aprobar l'autodisolución de la nuesa organización.

L'autodisolución supunxo'l cese total d'actividaes de Terra Lliure, pero dalgunos elementos nun aceutaron l'abandonu de la llucha armao y siguieron con actividaes terroristes nes files d'ETA, como Joan Carles Monteagudo, integrante del Comandu Barcelona que perpetró los atentaos de Sabadell y la casa-cuartel de Vich, que saldáronse con 16 víctimes mortales. Monteagudo morrió en 1991 mientres un enfrentamientu cola Policía española.^[5]

Disolución

Ver tamién: Operación Garzón

En xunu de 1992, poco primero de la celebración de los Xuegos Olímpicos de Barcelona, producióse la detención, por sorpresa y en circunstancies que crearon abonda polémica, d'unos 60 antiguos militantes de Terra Lliure nel marcu de la denominada Operación Garzón (nome del xuez que lu ordenó), fechu qu'impautó fuertemente na sociedá catalana, una y bones Terra Lliure habíase autodisuelto y cesáu les sos actividaes l'añu anterior y l'opinión pública consideraba la tema yá superada. De los procesaos, 15 deteníos presentaron una demanda escontra España énte'l Tribunal Européu de Derechos Humanos alegando sufrir tortures. El 2 de payares de 2004 el Tribunal emitió'l so fallu. Nél, magar refugaba les alegaciones de tortures per falta de pruebes, condergaba al Estáu español por nun facer una investigación fondo y efectivo de los fechos, acordies con l'artículu 3 del Conveniu Européu de Derechos Humanos, con cuenta de pescudar si éstes tuvieren llugar, considerando que la investigación fecha nun fuera refecha. España foi condergada a indemnizar a los demandantes con 8.000 euros cada unu por daños morales. Tamién se-y impunxo'l pagu de 12.009 euros en conceutu de costes llegales.^[6]

Esquerra Republicana de Catalunya (ERC), una de les principales formaciones del independentismu catalán, fixo de mediador pa la reinserción de los presos proponiendo la integración de los miembros de la organización nel so partíu, tomando como exemplu la vía non violenta escontra la independencia de Lituania. Los antiguos activistes de Terra Lliure que s'integraron n'ERC nun teníen causes criminales pendientes.

La disolución formal de lo que quedaba de Terra Lliure foi fecha pública'l 11 de setiembre de 1995, mientres el Día Nacional de Cataluña o Diada. Tolos presos de la organización acabaron siendo indultaos, dalgunos inclusive en negándose a recibir beneficios penitenciarios. Los últimos miembros de la organización condergaos foron indultaos yá pol primer gobiernu de José María Aznar. A finales de 1996 yá nun quedaba nengún presu de Terra Lliure en cárceles españoles.

Poble Lliure foi considerada como socesora del brazu políticu de Terra Lliure.

Ver tamién

• Cronoloxía de Terra Lliure

Referencies

1. Terra Lliure anuncia la so autodisolución y formaliza el so ingresu en Esquerra, El País, 16 de xunetu de 1991
2. Canal, Jordi (2018). Con permisu de Kafka. El procesu independentista en Cataluña. Barcelona: Península, páx. 180-181. ISBN 978-84-9942-689-1.
3. Soliciten 86 años pa los militantes de Terra Lliure que dispararon contra Jiménez Losantos, El País, 1 de xunetu de 1983
4. El País: Pere Bascompte, ex líder de Terra Lliure, torna a España ensin cargos El País, 22 d'agostu de 1986
5. El Mundo: El 'gora' d'ETA a un terrorista vascu y a otru catalán.
6. AFFAIRE MARTINEZ SALA ET AUTRES c. ESPAGNE (en francés)