Rien Poortvliet

Rien Poortvliet
Rien Poortvliet e 1978
Ganedigezh	7 Eost 1932 Schiedam,  Izelvroioù
Broadelezh	Izelvroat
Micher	Treser, livour, skrivagner
Prantad	1955-1992
Marv	15 Gwengolo 1995 Soest, Izelvroioù

Marius Harm "Rien" Poortvliet (Schiedam (Zuid-Holland), 7 a viz Eost 1932 – Soest (Utrecht), 15 a viz Gwengolo 1995) a oa un treser hag ul livour izelvroat, ur mestr war an taolenniñ al loened. Brudet e oa ivez evit bezañ aozet skeudennoù al levr « Leven en werken van de Kabouter » ("Buhez hag oberennoù ar c'hornandoned") skrivet gant an Izelvroad Wil Huygen 1922-2009 hag adembannet meur a wech abaoe.
Ur c'honter dre skeudennoù e oa R. Poortvliet : e dresadennoù a gont istorioù drezo o-unan, dibaot a wech e lenner un alc'hwez berr en o c'hichen. Ur skeudennaouer levrioù ne oa ket : diwar e skeudennoù e veze savet skridoù.

Buhez

Mab henañ Zacharias Poortvliet, ur plastrer, hag e wreg Cornelia e oa Rien. Petra bennak ma oa yaouank-tre pa ziskouezas bezañ donezonet evit an tresañ ez enebas e dud, protestanted strizh anezho, ouzh e c'hoant da vont da arzour.

Echuet gantañ e studioù eil-derez, ma kejas ouzh e wreg Corrie Bouwman, ez eas da implijer yaouankañ un ti bruderezh kent ober e servij-soudard er Morlu ma skeudennaouas ar mareadeg Alle Hens ("Kement dorn a zo"). Goude-se e kavas labour e skourr ar bruderezh an embregerezh Unilever.
E-kichen tresañ familhoù eürus o tebriñ soubenn pe o skaotañ al listri e skeudennaoue R. Poortvliet levrioù evit ar vugale skrivet gant Jaap ter Haar (1922-1998).

Labour a-walc'h en devoa an skeudennaouer e dibenn ar bloavezhioù 1960 evit bevañ diwar e arz, ha mont da hemolc'hiñ gant e zaoulagad digor-bras : e 1972 e voe embannet e levr kentañ, Jachttekeningen ("Tresadennoù hemolc'h") ma taolenne loened ha gweledvaoù gant tresadennoù ha dourlivadurioù.

Adalek 1976 e skeudennaouas troioù-kaer ar c'hornandoned evit an ti-embann Van Holkema & Warendorf e Bussum (Noord-Holland) ; 61 embannadur eus al levr kentañ zo bet betek-henn. Gant ar c'hornandoned-se e voe brudet Rien Poortvliet er bed a-bezh : troet e meur a yezh e voe al levrioù, ha tresadennoù-bev a voe graet e 1985.

Plijout kenañ a rae oberennoù Rien Poortvliet d'an dud dre vras, daoust da arzvarnourien lavaret e oa an arzour un den pilpous pa daolenne ker brav an natur padal e oa un hemolc'her daonet. Berz a reas an arzour er skinwel pa voe unan eus izili ar c'hoari Ao Vader, Zo Zoon ("Mab e dad eo Kadiou" ; 1978-1982, ur wezh e 1990).

D'ar 15 a viz Gwengolo 1995 e varvas Rien Poortvliet en e 63vet bloaz diwar krign-bev an eskern e Soest, e-kichen e wreg Corrie Bouwman hag o daou vab.

Enorioù

Er bloaz 1976 e tegemeras R. Poortviet digant daouarn ar priñs Bernhard van Lippe-Biesterfeld (1911-1980) ar Zilveren Anjer ("Jenoflenn Argant") a vez deroet bep bloaz da dud dibar war dachenn ar sevenadur, evit bezañ kemeret perzh e kelenn d'ar vugale doujañ d'an natur dre e levrioù Jachttekeningen (1972), ... de Vossen hebben holen ("... al lern o deus douarennoù") (1973) ha Te hooi en te gras ("Re a foenn ha re a c'heot") (1975).

Er bloaz 1992 e tigoras ar priñs Bernhard ar Rien Poortvliet Museum e ti-kêr kozh Middelharnis (Zuid-Holland) ; freuz-stal a reas ar mirdi e 2006, met digoret e voe a-nevez e miz Gouere 2009 war Enez Tiengemeten e kêr Hoeksche Waard (Zuid-Holland)^[1].

Oberennoù

  Un dibab oberennoù eo al listennig-mañ.

• Op verkenning bij de dieren ("Imbourc'hiñ al loened", skrid gant Han Rensenbrink, 1962) — ISBN 978-90-6113-001-7 (Eil embannadur, 1970)
• Jachttekeningen (1972) (ISBN 978-90-269-4801-5)
  • (fr) Dessins de chasse (ISBN 978-2356530394)
• ...de Vossen hebben holen (1973) (ISBN 978-90-269-4949-4)
  • (fr) Le Bestiaire sauvage (ISBN 978-2-901196-02-0)
• Hij was een van ons (1974), "buhez Jezuz Nazaret" (ISBN 978-90-269-4947-0)
  • (fr) Il était l'un des nôtres (ISBN 978-2-249-62019-5)
• Te Hooi en te gras (1975), a-zivout buhez ar gouerien (ISBN 978-90-269-6296-7)
• Leven en werken van de Kabouter (1976, skrid gant Wil Huygen) (ISBN 978-90-269-4958-6)
  • (fr) Les Gnomes (ISBN 978-2-226-00826-8)
• Het brieschend paard (1978), "Ar marc'h o yudal" (ISBN 978-90-269-4968-5)
• Van de hak op de tak (1980), emvuhezskrid skeudennaouet gant an aozer (ISBN 978-90-269-4306-5)
• De oproep der Kabouters (1981, "Galv ar c'hornandoned", skrid gant Wil Huygen) (ISBN 978-90-269-4799-5)
  • (fr) Le livre secret des gnomes (ISBN 978-2-226-03175-4)
• Braaf (1983) (ISBN 978-90-269-4832-9)
  • (fr) Le grand livre des chiens (ISBN 978-2-7242-4442-7)
• De ark van Noach of Ere wie ere toekomt (1985) (ISBN 978-90-242-3206-2)
  • (fr) L'Arche de Noé (ISBN 978-2-85108-471-2)
• Langs het tuinpad van mijn vaderen (1987, "A-hed hent liorzh ma zadoù", diwar-benn e hendadoù adalek ar bloaz 1600) (ISBN 978-90-242-4800-1)
  • (fr) Mon pays retrouvé (ISBN 978-2-09-290084-0)
• Het boek van Klaas Vaak en het ABC van de slaap (1988 skrid gant Wil Huygen) (ISBN 978-90-242-4499-7)
  • (fr) Le Marchand de sable et l'abécédaire du sommeil (ISBN 978-2-09-240020-3)
• De tresoor van Jacob Jansz. Poortvliet (1991, a-zivout buhez un den boutin e 1566 a-raok Brezel ar Pevar-Ugent Vloaz) (ISBN 978-90-242-7171-9)
• Aanloop (1993) (ISBN 978-90-242-6937-2)
  • (fr) L'Affût (ISBN 978-2-901196-43-3)
• Kabouter kinderversjes (1994), rimadelloù evit lakaat ar c'hornandoned da gousket) (ISBN 978-90-242-8332-3)
• Van een kabouter die niet met vakantie wil (1995), "Diwar-benn ur c'hornandon na fell ket dezhañ mont e vakañsoù" (ISBN 978-90-242-2449-4)
• Kabouter Spreekwoordenboek (dalif, 1996, "Geriadur krennlavarioù ar c'hornandoned", skrid gant Wil Huygen) (ISBN 978-90-242-7882-4)
• Het Kabouterkookboek – Recepten voor kabouters van 0 - 400 jaar (dalif, 2003, "Levr kegin ar c'hornandoned – Rekipeoù evit kornandoned oadet 0-400 vloaz", skrid gant Wil Huygen) (ISBN 978-90-242-8977-6)
• Tussen gaap & slaap (dalif 2003, "Etre bazailhat ha kousket", adembannadur azgwelet eus Het boek van Klaas Vaak en het ABC van de slaap 1988) (ISBN 978-90-435-0753-0)
• De wereld van de kabouter (dalif 2010, "Bed ar c'hornandon", skrid gant Wil Huygen) (ISBN 978-90-5977-190-1)
  • (fr) Le monde des gnomes (ISBN 978-2-09-277154-9)

Liammoù diavaez

• (nl) 'Rien Poortvliet Museum'. Kavet : 14 Du 2021.
• (uk) Taolennoù gant R. Poortvliet. Kavet : 14 Du 2021.
• (en) Kavet : 14 Du 2021
• (en) Listenn glok (2011) oberennoù R. Poortvliet. Kavet : 14 Du 2021.

Notennoù

1. E kumun Korendijk e oa an enez betek 2019 ; Rien Poortvliet Museum Korendijk a lenner c'hoazh war lec'hienn ar mirdi.