Abdallah Ibrahim

Abdallah Ibrahim
Irudi gehiago
Marokoko lehen ministro 1958ko abenduaren 16a - 1960ko maiatzaren 20a ← Ahmed Balafrej ^(en) - Ahmed Bahnini ^(en) →
Bizitza
Jaiotza	Al Haouz Province ^(en) , 1918ko abuztuaren 24a
Herrialdea	Maroko
Heriotza	Casablanca, 2005eko irailaren 11 (87 urte)
Familia
Familia	ikusi Abdelkader Hassan El Assimi ^(en) (koinatu) Nizar Ibrahim (son's son ^(en) )
Hezkuntza
Hizkuntzak	arabiera ingelesa
Jarduerak
Jarduerak	politikaria
Jasotako sariak	ikusi Grand Officer of the Order of the Throne  (2005eko urtarrilaren 31)
Sinesmenak eta ideologia
Alderdi politikoa	Istiqlal Alderdia Herri Indarren Batasun Nazionala

Abdallah Ibrahim (arabieraz: عبد الله إبراهيم‎; Marrakex, 1918ko abuztuaren 24a - Casablanca, 2005eko irailaren 11)^[1]. Marokoko politikari eta agintaria izan zen^[2].

Gaztaroa

Marokoko klase ertainean hazi zen. 1943an teologiako doktoretza egin zuen, eta ondoren Parisen, Sorbonako unibertsitatean jarraitu zuen ikasten. Besteak beste Jean-Paul Sartre, Louis Aragon eta François Mauriac idazleak ezagutu zituen han.

Unibertsitateko irakasle eta idazle izan zen. Besteak beste Résistance face aux tempêtes (Erresistentzia ekaitzen aurrean) liburua idatzi zuen, eta beste hainbat liburu militantziaz eta iraultzaz. L’Islam à l’horizon 2000 liburua ere idatzi zuen, islamismo politikoaren indartzeari buruz.

Ibilbide politikoa

Marokoko protektoratu garaian, independentziaren aldeko mugimendu politikoan ibili zen. 1937ko irailaren 24an manifestazio bat antolatu zuen Frantziatik zetorren ministro-orde baten bisitaren kontra protestatzeko, eta Maroko kolonialaren “zinezko aurpegia” erakusteko. Dozenaka mila lagun bildu ziren. Frantziaren erantzuna errepresioa izan zen, eta Ibrahim erbestera joatera behartu zuten.

Haren ustez, mugimendu independentistaren aitzindari izan behar zen langile klasea, eta Marokoko Lanaren Batasuna sindikatua sortu zuen 1955ean. Halaber, Independentziaren Manifestua izenpetu zuen, eta Istiqlal alderdiaren sortzaileetako bat izan zen. Alderdi horren egunkari Al-Alam-eko erredaktore-buru izan zen.

Independentzia negoziatzen ari ziren garaian, Kontseiluko presidentearen estatu idazkari bihurtu zen, 1955eko abenduaren 7an. Ez zen monarkia absolutura itzultzearen aldekoa. Askapen nazionalerako armada (Armée de libération nationale, ALN) babestu zuen.

Politika ezkertiarren alde

Independentzia lortu ondoren, Bekkai-ren gobernuan parte hartu zuen. Haren helburua zen politika sozialdemokrata aplikatzea, baina hainbat desadostasun zeuzkan beste ministro batzuekin. Harreman txarra izan zuen Hassan II.a errege bihurtuko zenarekin. 1956ko urriaren 26an Lanaren eta Gai Sozialetako ministro bihurtu zen. 1958ko abenduaren 24an, Mohammed V.a erregeak Gobernu Kontseiluko presidente izendatu zuen. Baina erregeak berak kargu hartatik kendu zuen urte bat eta erdi geroago, 1960ko maiatzaren 20an.

1959an, Herri Indarren Batasun Nazionala alderdiaren sorreran parte hartu zuen Mehdi Ben Barka eta Abderrahim Bouabid-ekin batera. Alderdiko idazkari nagusi hautatu zuten. 1976an politika utzi zuen.

Erreferentziak

1. Boudarham, Mohamed. (2005/9/12). «Un militant s'en va» Aujourd'hui le Maroc (Noiz kontsultatua: 2020/1/24).
2. Barrada, Hamid. (2005/9/19). «Abdellah Ibrahim ou la mauvaise conscience du Maroc» Jeune Afrique (Noiz kontsultatua: 2020/1/24).