Friends
Friends ye una serie de televisión d'Estaos Xuníos aniciada y producida por Marta Kauffman y David Crane. Emitióse por primer vez el 22 de setiembre de 1994 pola cadena NBC y remató'l 6 de mayu de 2004. Trata sobre la vida d'un grupu d'amigos -Rachel, Ross, Chandler, Joey, Monica y Phoebe- qu'ania en Manhattan, Nueva York. Asoceden tanto bonos como malos momentos pero con una crítica cómica a los temes más trascendentales de l'actualidá. Darréu del éxitu nel so país, entamó la so difusión per tol mundu con semeyaos restultaos.
La serie ta compuesta de diez temporaes d'unos 24 capítulos, salvo la cabera, que tuvo 18 capítulos. Una vez rematada rodóse Joey, un spin off sobre la vida del personaxe homónimo en Los Ángeles. Tamién tuvo un pequeñu crossover cola serie Mad About You, cuando Jamie y Lisa entren a Central Perk trafulcando a Phoebe Buffay cola so hermana ximielga Ursula.
Personaxes
[editar | editar la fonte]- Rachel Green (Jennifer Aniston): Amiga de Monica dende la infancia (pero nun se vían dende facía más de 5 años). Ye fía del Dr. Leonard Green y Sandra Green (anguaño divorciaos), foi una nena consentida, por ser fía de pas ricos. Tien dos hermanes, Jill y Amy, tan consentíes como ella. Al entamar la primer temporada, decide abandonar al so prometido Barry Farber nel altar ya que nel caberu momentu se decata de que realmente nun lu ama. Abandona la so bona vida, p'asina, poder dedicase a trabayar pa ganar el so propiu sueldu. Asina y too, a veces sal-y la nena consentida que lleva nel so interior. Entamó trabayando de camarera en Central Perk, pero poco a poco ye quien a inxerise nel mundu de la mdoa, la so verdadera pasión. Ye torpe aesgaya, ya nun ye a concentrase en dalgo que nun-y interese, amás tien el defeutu de camudar tou regalu que se-y da. Tuvo estremaos novios na serie, ente los qu'encalquen Bruce Willis. Pero'l so verdaderu amor siempres foi Ross, col que tuvo una fía, Emma.
- Monica Geller, (Courteney Cox): Ye hermana de Ross, vive nel apartamentu onde vivía la so güela. De pequeña yera gorda pero adelgazó de rapaza cuando Chandler la llamó gorda. Ye concinera profesional, trabayando n'estremaos restoranes a lo llargo de la serie. Caracterízase pola so obsesión pol orde y la llimpieza. Tamién ye competitiva y eficiente aesgaya en cualesquier cosa que fai. La mayoría de les folixes o cenes especiales faense nel so apartamentu, porque-y gusta muncho ser l'anfitriona. Na séptima temporada casa con Chandler Bing, col qu'acaba adoptando ximielgos, una nena llamada Erica n'honor a la ma de los ximielgos y un nenu llamáu Jack n'honor al pá de Monica Geller y Ross Geller.
- Phoebe Buffay, (Lisa Kudrow): Ye la más distraída del grupu. Tamién ye la tuvo la infancia más abegosa. So ma abandonóla dexándolas a ella y a la so hermana ximielga Ursula, con quien nun fala regularmente; ya so ma adoptiva suicidóse cuando elles yeren unes rapaces. Amás, so pá biolóxicu abandonólas y so padrastru foi a prisión, polo qu'acabó viviendo na cai. Ta un pocu abarrenada y ye rara, y nun dulda n'amosalo. Camienta normales coses que los deman ven de llocos. Magar tener tenío que vivir na cai robando, ye mui inocente y mui cariñosa colos sos amigos; siempres ta ehí cuando ellos la necesiten. Ye vexetariana y ama a tou ser viviente y, inclusive, a seres non vivientes. Exerció de ma d'alquiler porque so mediohermanu, Frank Buffay Jr., nun podía tener fíos con so muyer, Alice Knight, muncho mayor qu'él. Nel entamu de la 5ª temporada, Phoebe dio a lluz a los trillizos: Frank Jr. J., Lesli y Chandler. Phoebe gánase la vida como masaxista, pero tamién esfruta de componer cantares y tocales acompañada de la so guitarra en Central Perk. Na décima temporada cásase con Mike Hannigan (Paul Rudd).
- Joey Tribbiani (Matt LeBlanc): Vien d'una familia Italo-Americana, ye'l mayor de 8 hermanos siendo él l'únicu home. Ye'l menos intelixente del grupu y siempres tarda n'atolenar lo que-y dicen. Gánase la vida como actor, protagonizando anuncios, obres de teatru y sobre too telenoveles, pasando pol so mayor éxitu, la serie Days of our Lives. Ye aficionáu de los Knicks. Gústan-y muncho les muyeres, teniendo romances aesgaya. Igual que Monica, présta-y la comida, anque él nun ye tan refináu, la so comida favorita son los Sándwiches y anoxa compartir la comida. Namórase de Rachel, sicasí la so rellación nun avaga más qu'una selmana per aciu de lo abegosu que resulta ya que Rachel acaba de tener un nácaru con Ross Geller y había una gran historia ente ellos.
- Chandler Bing (Matthew Perry): Compañeru d'habitación de Ross durante la universidá y anguaño maríu de Monica. Ye'l sarcásticu del grupu, forma de ser debida a la so traumática infancia con un pá homosexual, que dempués de divorciase de so muyer sería'l protagonista d'un show pa travestis en Las Vegas llamáu "Viva les Gaygues". Dende entós, usa'l sarcasmu y la ironía pa rise de toos y de too, como un preséu de defensa. Anoxa'l Día d'Aición de Gracies, ya que foi nesti día cuando sos pas-y dixeron que diben divorciase; tamién anoxa'l so trabayu que consiste "n'analís estadísticu y reconfiguración de datos", trabayu al que fina renunciando pa desenvolvese no qu'en realidá-y gusta: la publicidá. na séptima temporada cásase con Monica Geller, cola qu'adopta ximielgos.
- Ross Geller (David Schwimmer): Ye l'hermanu mayor de Monica. Ye doctor en paleontoloxía. Entamó trabayando nun muséu y remató de profesor na Universidá de Nueva York NYU. Ye'l más intelixente y cultu, llegando a aburrir al restu coles sos llargues lleiciones. Divorcióse de Carol, tando embarazada de so futuru fíu Ben, cuando descubrió que ella yera lesbiana. Dende entós, dáse-y mal lligar coles moces. Volvió a casase con una inglesa llamada Emily, pero se divorciaron rápidamente ya que cuando taba nel altar s'enquivocó de nome, mentando'l de Rachel. Casóse una tercer vez con Rachel tando vinaos en Las Vegas y de nuevu divorcióse. Más sero tuvieron una fía, Emma. Cuando Rachel decidió mudase a Francia, decatóse de que l'amaba de verdá, asina que foi a la gueta d'ella al aeropuertu. Cuando torna ensin Rachel, escucha un mensaxe d'ella que decía que lu amaba. Nel mesmu capítulu Rachel vuelve y reconcíliense.
Nos contratos orixinales, cada ún de los seyes protagonistes tenía un salariu de 22.500 dólares USA, por cada episodiu de la primer temporada y d'ente 20000 y 40000 por cada episodiu de la segunda temporada. Enantes de facer les negociaciones con Warner Bros sobre cual sería'l so salariu na tercer temporada, el grupu d'actores decició que'l pagu sería exactamente'l mesmu pa toos, Warner Bros nun taba d'alcuerdu ya que prefería qu'a cada personaxe de la serie se-y pagara diferente, pero los actores dixeron que queríen que los trataren por igual a toos. Los protagonistes recibieron 75000 dólares na tercer temporada, 85000 na cuarta, 100000 na quinta y 125000 na sesta temporada. El salariu foi de 750000 na séptima y outava temporaes y 1 millón por episodiu de la novena y décima temporaes.
Personaxes secundarios
[editar | editar la fonte]- Gunther (James Michael Tyler): adlinistrador del café-bar Central Perk, al que van los seyes amigos. Ta namoráu de Rachel.
- Janice (Maggie Wheeler): ex novia de Chandler, conocida pola so frase "¡Oh,Dios Mio!" y pola so peculiar risa. Tamién salió con Ross.
- Jack Geller (Elliott Gould): pá de Ross y Monica.
- Judy Geller (Christina Pickles): ma de Ross y Monica.
- Mike Hannigan (Paul Rudd): noviu y maríu de Phoebe.
- Richard Burke (Tom Selleck): ún de los novios que tien Monica durante la serie.
- Estelle Leonard (June Gable): la representante de Joey.
Trama
[editar | editar la fonte]La historia entama con cuatro amigos (Chandler, Monica, Phoebe y Joey) charrando nuna cafetería llamada Central Perk. A midida que pasa l'entamu del capítulu apaez el quinto personaxe (Ross) y posteriormente la sesta (Rachel). Esti alcuentru dientro de la cafetería afita l'entamu d'una comecia basada na amistá, los trunfos y las cayidas, l'amor, el pasáu y el futuru d'un grupu d'amigos na ciudá de Nueva York.
Rachel acaba d'abandonar nel altar al que diba ser so esposu y afuyió de la so vida de nena rica pa entrar nun mundu onde deberá facese cargu de les sos propies necesidaes, esquerando l'encontu de la so única amiga na ciudá, Monica. Decide quedar nel so apartamentu y entamar una vida normal. Ross, que siempres tuviera namorado d'ella, atopa una nueva oportunidá de conquistala dempués del so matrimoniu fallíu con Carol. El so intentu nun ye en vanu; sicasí, ente entamos y frayadures, Ross y Rachel tendrán qu'esperar diez años pa tar xuntos definitivamente, pasando poles sos vides dos frayadures, una reconciliación, una boda, un divorciu y una fía llamada Emma.
Magar tar latente tola serie l'amor ente Ross y Rachel, nun roba protagonismu al verdaderu sentíu desenfrenáu de la serie onde cada unu puede presentar un matiz completu de cites, novialgos y matrimonios. Otra pareya que sí foi quien a concretar d'una manera más rápida la so rellación foron Chandler y Monica quienes tres tener pasao desengaños y amores frayaos atoparon que la pareya perfeuta yeren ellos mesmos y dempués d'un tiempu esondiendo la so rellación, a la fin esta asoleyó, llegándose a casar na séptima temporada.
El toque más puramente humorísticu apórtanlo Phoebe y Joey quienes na serie dexen atolenar munches vegaes que podría xurdir un romance ente ellos y inclusive hai casos onde Phoebe diz qu'acabaríen xuntos. A la fin esto nun asocede, Phoebe acaba felizmente casada con Mike Hannigan y Joey marcha a Hollywood a facer el so suañu de tornase nuna estrella de verdá.
Grabación
[editar | editar la fonte]La primer temporada foi grabada nel Stage 5 en Warner Bros. Studios en Burbank. L'opening de la serie foi filmao nuna fonte en Warner Bros. Ranch a les 4:00 am. Nel entamu de la segunda temporada, la producción mudóse al Stage 24, que foi renomao como "The Friends Stage" dempués de la fin de la serie. La grabación de la serie entamó nel branu de 1994 delantre d'una audiencia en vivu, a la que se-y dio un resume de la serie pa familiarizase colos seyes protagonistes; contrataron a un comediante qu'entretenía a l'audiencia ente tomes. Cada episodiu con 22 minutos de duración, tardaba seyes hores en grabase, -el doble de lo qu'avagaba cualesquier comedia- por aciu, cimeramente, de les reescritures del guión.
Anque los productores siempres quixeron aprovechar el llugar onde vivíen los personaxes, Friends nunca nun se grabó en Nueva York. Cuntóse que grabar n'esteriores fairía l'espisodiu menos cómicu y que l'audiencia yera una parte importante de la serie. El set tenía que ser abondo grande pa les cámeres, iluminación y "pa que l'audiencia supiera qué taba pasando". La fin de la cuarta temporada foi grabao en Londres porque los productores yeren conscientes de la popularidá de la serie nel Reinu Xuníu Les escenes foron grabaes nun estudiu con tres audiencies, cada una integrada por 500 persones. Ésta foi la mayor audiencia durante tola serie. La fin de la 5ª temporada, afitada en Las Vegas, foi grabada en Warner Bros. Studios.
Música
[editar | editar la fonte]El cantar de la serie ye "I'll Be There For You", compuesta especialmente pa la serie por Michael Skloff y Allee Willis y interpretada pol grupu The Rembrandts. Munchos fans tuvieron que mercar l'álbum enteru de la banda porque nun entamu el cantar nun taba asoleyáu en single. Un añu más sero -en 1995- el single editóse y algamó'l primer puestu nes llistes britániques y el puestu númberu 17 na clasificación de Billboard n'EEUU.
Amás d'esta tema, sonaron dellos cantares durante la serie.
Escenografía
[editar | editar la fonte]La serie tien llugar na ciudá de Nueva York con salides a: Barbados, Londres, playes, Las Vegas, Tulsa, etc.
L'apartamentu de Chandler y Joey
[editar | editar la fonte]Nél pasaron momentos inolvidables Chandler, Joey. Una vez Rachel y Monica perdieron el so apartamentu nuna apuesta, camudándo-ylu colos mozos. A la fin Joey y Chandler tornan al so apartamentu como recompensa a Rachel y Monica pol besu que se dan ente elles. Pero cuando Chandler y Monica foron a vivir xuntos l'apartamentu quedó-ylu Joey. Otros inquilinos foron Eddie, cuando Joey foi un tiempu a vivir solu, Janine (Elle Macpherson) y Rachel, quien nes caberes temporaes vivió con Joey. Nél vivieron toos, pues Phoebe pasó dalgunos díes con Joey cuando na sesta temporada se quemó'l pisu que compartía con Rachel, y Ross vivió ellí cuando al desapartase d'Emily, quedó ensin apartamentu.
L'apartamentu de Monica
[editar | editar la fonte]Quiciabes seya l'apartamentu más conocío porque ehí pasen la mayor parte de los episodios. Nél vivió siempres Monica, pero tuvo como ñeres de pisu tanto a Rachel como a Phoebe. Nes caberes temporaes viven ella y Chandler. Nel caberu episodiu, Monica espeya que dempués de diez años de guardar el secretu, que Ross tamién vivió ellí cola so güela cuando quería ser beillarín. Y ye nesi episodiu cuando se decatan de que toos vivieron ehí dalguna vegada. Y ye que Monica nun vivió siempres ehí sinón que durante unos episodios Joey y Chandler y-ganaron el pisu a Monica y Rachel nuna apuesta y se mudaron ellí pero dempués de dellos díes lo recuperaron.
L'apartamentu de Phoebe
[editar | editar la fonte]Nél tuvieron viviendo xuntas Phoebe y Rachel. Nun ye un decoráu que s'use muncho na serie pero si hubo dellos capítulos nos que pasó muncha aición nel so interior, como cuando Phoebe tien que decidir si quedar con Mike Hannigan o con David. Na sesta temporada, cuando Phoebe acepta vivir con [[[Rachel Green|Rachel]], accidentalmente esta postrera dexa prendida la so plancha pal pelu, Phoebe decátase de que Rachel prefier vivir con Joey. Eso provoca que Phoebe-y regale una serie de coses a Joey que fagan que Rachel tenga miéu o se moleste, pa volver a vivir con Phoebe Pero tien l'efeutu contrariu, dau qu'a Rachel-y presten les coses de Phoebe. Rachel fina decatándose de lo que ta asocediendo y decide mudase otra vegada con Phoebe. Cuando van ver l'apartamentu, descubren que lso bomberos esbarrumbaron la paré qu'estremaba los dos cuartos onde Phoebe y Rachel dormíen. A Phoebe gústa-y y como escusa pa que Rachel nun viva ellí faló col espíritu de so güela, que, según ella, y-decía que quede sola.
L'apartamentu de Ross
[editar | editar la fonte]Al entamu de la serie, Ross alcuéntrase organizando'l so apartamentu de solteru, n'outra parte de Nueva York. Dempués de divorciase d'Emily camuda de fogar, llegando asina al apartamentu del Ugly Naked Guy ("home feu desnudu"), el que consigue, precisamente, desnudándose. Equí Ross tuvo momentos estelares como cuando xusto dempués de mudase descubre que Monica y Chandler tán xuntos al velos al traviés de la ventana, o cuando semeya tar con so fíu Ben y se-y cae la tiesta-calabaza d'ésti. A la fin de la serie viven nél Ross y Rachel.
Central Perk
[editar | editar la fonte]Esta cafetería ye tamién un llugar de conceyu imprescindible en tolos capítulos se la serie. Ye atendida por Gunther, ente otros camareros. Ellí trabayaron durante un tiempu como camareros Green y, posteriormente, Joey.
Los esteriores
[editar | editar la fonte]La mayoría de los llugares d'esteriores qu'apaecen na serie tán asitiaos nun barriu de Nueva York llamáu Greenwich Village. Los neoyorquinos llamen a esti barriu familiarmente "The Village", y ye que al entamu yera eso, sólo un pueblu, y tovía güei se nota esi orixe nel trazáu de les sos cais, con pequeños caleyos y patios axardinaos. Ye un barriu bohemiu con inclín gai d'escritores y artistes, tamién lu visiten muncho los mozos, per aciu de la cercanía de la Universidá de Nueva York. Anímase polas nueches con cafés qu'abres hasta altes hores de la mañana y clubes musicales.
Premios
[editar | editar la fonte]- 2003: Meyor actriz nuna serie de comedia o musical: Jennifer Aniston.
- 2003: Meyor actriz convidada nuna serie de comedia: Christina Applegate.
- 2002: Meyor serie de comedia.
- 2002: Meyor actriz nuna serie de comedia: Jennifer Aniston.
- 2000: Meyor actor convidáu nuna serie de comedia: Bruce Willis.
- 1998: Meyor actriz secundaria nuna serie de comedia: Lisa Kudrow.
- 1996: Meyor direutor nuna serie de comedia: Michael Lembeck (por "The One After the Superbowl").
- 2003: Actriz de serie de comedia favorita: Jennifer Aniston.
- 2002: Serie de comedia favorita.
- 2002: Actriz de serie de comedia favorita: Jennifer Aniston.
- 2001: Serie de comedia favorita.
- 2001: Actriz de serie de comedia favorita: Jennifer Aniston.
- 2000: Serie de comedia favorita.
- 2000: Actriz de serie de comedia favorita: Jennifer Aniston.
- 1999: Serie de comedia favorita.
- 1995: Nueva serie de televisión favorita.
- 2000: Meyor actriz nuna serie de comedia: Lisa Kudrow.
- 1996: Meyor repartu nuna serie de comedia.
Dempués del final
[editar | editar la fonte]- Matt Le Blanc (Joey Tribbiani): continuó cola saga de Friends pero en solitariu con una serie (spin off) que lleva'l nome del so personaxe, Joey, tresmitida pola mesma cadena y baxo los mesmos creadores. Nella, Joey preba suerte en Hollywood, agora cola so hermana y el so sobrín xunto a él. Magar Joey yera consideráu ún de los personaxes más humorísticos, pa los fanáticos de Friends nun tuvo la mesma comicidá ensin los demás protagonistes polo que'l so éxitu foi mínimu. Sólo con dos temporaes decidióse cancelar la serie y llegó a la so fin el 7 de marzu de 2006. Agora ta trabayando na so nueva serie llamada Episodes, onde s'interpreta a sí mesmu.
- Courteney Cox (Monica Geller): continúa la so carrera nel cine y aborda non sólu la comedia sinón qu'actuó en nuevos xéneros talos como'l drama-comedia Cougar Town nel que recibió una nominación a los SAG. Amás, Cox foi propietaria xunta a so ex-maríu, David Arquette de quien se divorció en 2010, de la productora "Coquette" qu'anguaño produz una nueva serie protagonizada por Cox, Cougar Town.
- Matthew Perry (Chandler Bing): entamó actuando nun episodiu de Scrubs, presentando dalgunos premios y entrando poco a poco nel cine con películes de non mui altu relieve. Dempués trabayó nuna serie de la cadena NBC llamada Studio 60 on the Sunset Strip. amás ye co-creador y escritor de The End of Steve y Mr. Sunshine.
- Jennifer Aniston (Rachel Green): foi quien dio'l mayor saltu post-Friends de los seyes actores. Ya protagonizó trés éxitos en taquilla, presentó dellos premios y tien en mente y a la orde munchos más proyeutos. Paralela a los sos éxitos de carrera, la so rellación con Brad Pitt remató en divorciu en 2005. Dempués entamó una nueva rellación col so compañeru Vince Vaughn. Esta rellación tamién terminó, dempués venceyó-yla amorosamente a Keanu Reeves y a un modelu británicu de 36 años llamáu Paul sculfor, mantién una gran amistá colas sos ex-compañeres de la serie Courteney Cox y Lisa Kudrow.
- David Schwimmer (Ross Geller): ta abriéndose pasu como actor, direutor y productor. Ya actuó en delles películes, dio-y voz al personaxe de la xirafa nes dos películes d'animación Madagascar y entamó a producir les sos propies. Tamién tuvo un papel na serie Band of Brothers.
- Lisa Kudrow (Phoebe Buffay): decidió nun entamu inclinase pola vida familiar pero esto nun quier dicir que dexara l'escenariu; antigual, supo facer espaciu na so vida pa rodar películes d'estremaos xéneros, trames y condiciones. Actuó en Una terapia peligrosa y nuna película de mui baxo presupuesto Bark. Esto demuestra les sos ganes de ser una bona actirz ensin preocupase abondo por ser una Julia Roberts como ella mesma diz. Protagonizó la serie The Comeback la que-y dio una nominación a los Emmy como "Meyor Actriz de Comedia", convirtiéndose asina na primera de los seyes en consiguir una nominación importante dempués de Friends. Esa serie finó na so primer temporada. Agora ta abriéndose camín nel cine y tuvo mui bones crítiques. En 2008 actuó en P.D. Te Amo con un papel secundario y protagonizó una serie web llamada Web Therapy. Tamién tuvo una participacio´n especial en Cougar Town y un papel na película Easy A.
Película
[editar | editar la fonte]Tres la fin de la serie los rumores entamaron a aprucir d'una película de Friends, anque too resultó ser falso. Los rumores d'una película remanecieron dempués de la película Sex and the City en 2008 que resultó ser un éxito na taquilla. The Daily Telegraph informó en xunetu de 2008 que los miembros cimeros alcordaran protagonizar el proyeutu que'l rodaxe diba entamar nos vinientes 18 meses. Una fonte dixo que "Jennifer, Courteney ye el resto de los actores naguan repitir los sos papeles nes circunstancies afayadices". Cuando se-y entrugó sobre la película, Kudrow dixo que nun yera consciente de las conversas, pero espresó'l so interés na idea. Sicasí, el direutor de publicidá de Warner Bros, dixo que "nun hai nada de verdá na historia" y la vocera de Matthew Perry agregó que "nun pasa ndada nesti sen, polo que'l rumor ye falsu.
El 27 de setiembre de 2009 el tabloide News of the World afirmó que James Michael Tyler, quien interpretó a Gunther en Friends, dixo que la película "definitivamente" se fará, pa un llanzamientu en 2011. Jennifer Aniston, Courtney Cox y Lisa Kudrow mentaron que la película yera una "espiculación". Kudrow y Cox informaron a la Associated Press en xineru de 2010 que nunca foran contactadas por Crane y Kauffman pa facer una versión cinematográfica de la serie. Sicasí, Kudrow, Cox y Aniston dixeron que taben dispuestes a facer un conceyu d'Aición de Gracies.
Emisión n'otros países
[editar | editar la fonte]- N'España emitióse delles vegaes Friends. Primero na cadena Canal+ y llueu en Cuatro a lo llargo de tola década de los noventa y entamu de la década 2000. De magar el llunes 10 de xineru de 2011, emiten esta serie de 13:15 a 15:15 y de 14:00 a 16:00 las fines de selmana en Factoría de Ficción (FDF) (tercer cadena de Telecinco n'España), a nivel nacional al travies de la TDT, a razón de dos capítulos por día de llunes a vienres y cuatro capítulos durante sábados y domingos.
- En dellos países de Llatinoamérica la serie ye tresmitida por Warner Channel.
- En Méxicu la serie foi emitida por Canal 5 Televisa dende 1997 hasta 2006 y dende 2007 hasta 2011 la serie foi emitida por Azteca 7.
Referencies
[editar | editar la fonte]Enllaces esternos
[editar | editar la fonte]- Ver Friends online en yourtvseries.NET.
- Friends en sitio de Warner Bros. Studios
- Friends Archiváu 2012-01-15 en Wayback Machine it-movies.com.
Datos: Q79784
Multimedia: Friends (1994 TV series)