Albert Henry Vestal
  | |
| Biografía | |
|---|---|
| Nacemento | 18 de xaneiro de 1875 |
| Morte | 1 de abril de 1932 (57 anos) |
| Membro da Cámara de Representantes dos Estados Unidos | |
| | |
| Datos persoais | |
| Educación | Valparaiso University (en)  Indiana State University (en) |
| Actividade | |
| Lugar de traballo | Washington, D.C. |
| Ocupación | político, avogado |
| Partido político | Partido Republicano |
  | |
Albert Henry Vestal, nado en Frankton, Indiana, o 18 de xaneiro de 1875 e finado en Washington o 1 de abril de 1932, foi un xurista e político republicano estadounidense, membro da Cámara de Representantes por Indiana e presidente da Comisión de Moeda, Pesos e Medidas, e da Comisión de Patentes.
Traxectoria
[editar | editar a fonte]Primeiros anos e formación
[editar | editar a fonte]Albert Henry naceu nunha granxa próxima a Frankton, no condado de Madison, Indiana, o 18 de xaneiro de 1875,[1] un dos oito fillos de Mary Jackson (1833-1916) e de William Vestal (1835-1907).[2][3][4]
A súa nai proviña dunha familia de orixe escocesa e irlandesa. O seu pai, de relixión metodista e descendente dunha familia inglesa á que tamén pertencera o líder confederado Stonewall Jachson era un granxeiro que se instalara en Frankton en 1872.[2]
A infancia de Albert H. Vestal transcorreu no ambiente dos traballos propios dunha explotación agraria. Asistiu á escola pública no municipio de Pipe Creek e con só dezaseis anos desprazouse ao condado de Nemaha, en Nebraska onde comezou a exercer a docencia.[2]
Logo volveu á súa casa familiar e iniciou a súa formación superior, primeiro na Universidade Estatal de Indiana, en Terre Haute,[1] e despois na Escola Normal Nacional de Valparaíso, Indiana —que logo pasou a ser a Valparaiso University—. Alí compaxinou os seus estudos co exercicio da docencia ata que en 1896 acadou a súa licenciatura en Dereito.[1][2]
Carreira pública
[editar | editar a fonte]O mesmo ano da súa licenciatura ingresou no Colexio de Avogados e comezou o exercicio da profesión en Franckton, Indiana, que seguía a compaxinar coa docencia.[1][2] Logo dun curto período traballando no despacho de Wood & Ellis, constituíu a súa propia sociedade con James M. Farlow.[3]
Vestal foi elixido fiscal do condado de Madison, con apoio republicano,[2] e exerceu ese cargo entre 1900 e 1906.[1] Tras deixar a fiscalía, retomou o exercicio da avogacía en Anderson, no despacho Vestal & Van Nuys.[3]
_LCCN2016841811.jpg)
A súa carreira política comezou en 1908, cando se postulou para figurar nas listas republicanas ao Congreso, aínda que sen éxito. En 1914 chegou a figurar na candidatura, aínda que non saíu elixino. Nas eleccións de 1916 conseguiu resultar elixido como representante republicano; foi nomeado o 4 de marzo de 1917 e seguiu sendo elixido sucesivamente ata a súa morte en 1932.[1][3]
Durante esta etapa presidiu a Comisión de Moeda, Pesas e Medidas entre 1919 e 1925, e a Comisión de Patentes de 1925 a 1931. Tamén foi o voceiro da maioría na Cámara entre 1923 e 1932.[1][3]
Vida persoal
[editar | editar a fonte]Vestal casou o 15 de setembro de 1895 en Penniville, Indiana, con Madge Horn, con quen tivo dous fillos, chamados Vivian e Ralph. Logo do falecemento da súa esposa o 5 de agosto de 1899, Vestal casou en segundas nupcias o 8 de xaneiro de 1903, en Anderson, con Hulda Maude Malone (1879-1951).[2][3][4]
Albert Henry Vestal finou en Washington o 1 de abril de 1932, e o seu corpo foi soterrado no cemiterio East Maplewood de Anderson, Indiana.[1][4]
Notas
[editar | editar a fonte]- ↑ 1,0 1,1 1,2 1,3 1,4 1,5 1,6 1,7 "Albert Henry Vestal". Biographical Directory of the United States Congress.
- ↑ 2,0 2,1 2,2 2,3 2,4 2,5 2,6 Beers, J. H. (1908). Páxina 760.
- ↑ 3,0 3,1 3,2 3,3 3,4 3,5 "Albert H. Vestal collection. Biographical Note". Indiana State Library.
- ↑ 4,0 4,1 4,2 "Albert Henry Vestal". Findagrave.com
- ↑ "Reps. A.H. Vestal & C.J. McLeod Republican whips". Library of Congress (LOC.gov).
Véxase tamén
[editar | editar a fonte]Bibliografía
[editar | editar a fonte]- Beers, J. H. (1908). Commemorative biographical record of prominent and representative men of Indianapolis and vicinity. Beers, Chicago. 1908. Páxinas 760-761
- Brandon, R. H. (1908). Who is Who in Anderson. Anderson.
