Charles Roach Smith

Charles Roach Smith

Retrato e sinatura de Charles Roach Smith
Biografía
Nacemento	20 de agosto de 1807 Shanklin, Reino Unido ^(pt)
Morte	2 de agosto de 1890 (82 anos) Strood, Medway. Inglaterra
País de nacionalidade	Británica
Educación	Museum of London Antiquities.
Actividade
Campo de traballo	Antigüidades, numismática, arqueoloxía.
Ocupación	antropólogo, arqueólogo, numismático
Membro de	Lancashire and Cheshire Antiquarian Society ^(en) Société des antiquaires de l'Ouest ^(en) British Archaeological Association ^(en) Société des antiquaires de Picardie ^(en) Société nationale des Antiquaires de France ^(en) Société des antiquaires de Normandie ^(en) London and Middlesex Archaeological Society ^(en)
Obra
Arquivos en	Biblioteca Nacional de Gales
Premios
(1883): Medalla da RNS.
Descrito pola fonte	Dictionary of National Biography
Lista (1836)  Membro da Sociedade de Anticuarios de Londres

Charles Roach Smith, nado o 20 de agosto de 1807 na Illa de Wight e finado o 2 de agosto de 1890 en Strood, condado de Kent, foi un anticuario, arqueólogo afeccionado e numismático inglés, pioneiro no estudo estatístico dos achados de moedas romanas.^[1]

Pertenceu a diversas sociedades científicas, como a Sociedade de Anticuarios de Londres ou a Sociedade Numismática de Londres, e foi fundador da Asociación Arqueolóxica Británica.^[1]

Traxectoria

Familia e formación

Roach Smith naceu en Landguard Manor, Shanklin, na Illa de Wight, o máis novo dos fillos do granxeiro John Smith, e da súa muller, Ann, filla de Henry Roach, de Arreton Manor. O seu pai morreu cando Charles era un neno e desde aquela pasou a vivir na casa do seu avó materno, en Arreton. A súa nai morreu cara a 1824.^[2]

Roach Smith asistiu a unha pequena escola en Swaythling, Southampton, e cando o seu mestre foi destinado a St. Cross, preto de Winchester, Charles marchou con el. Arredor de 1820, continuou a súa educación nunha escola meirande en Lymington, Hampshire.^[2]

Carreira profesional

En 1821 traballou durante uns meses no despacho do avogado Francis Worsley, en Newport, Illa de Wight, e en 1822 comezou a traballar como aprendiz cun químico de Chichester, West Sussex, con quen permaneceu seis anos. En 1834 estableceu o seu propio negocio como químico en Lothbury, na Cidade de Londres, e entre 1840 e 1860 trasladouse a Finsbury Circus, na mesma cidade.^[2]

Xa desde a súa infancia, Roach Smith sentiu interese por coleccionar antigüidades, e foi apoiado polo anticuario Alfred John Kempe nesta afección. Durante vinte anos seguiu de preto as escavacións producidas en Londres e o dragado do río Támese, tanto como coleccionista como para o seu estudo, e en 1854 publicou un estudo sobre as antigüidades aloxadas no daquela existente Museo de Londres, procedentes das escavacións da cidade.^[3] Estes obxectos foron incorporados anos máis tarde ao Museo Británico, onde formaron o núcleo da colección nacional de antigüidades romano-británicas.^[1][2]

Roach Smith pasou a ser considerado axiña como a primeira autoridade do Londres romano. Foi un innovador ao lles prestar atención aos sitios arqueolóxicos urbanos, e a súa obra Illustrations of Roman London (1859) foron o traballo principal neste tema ata 1909.^[2][4]

Sociedades científicas

Roach Smith pertenceu a moi diversas sociedades científicas, tanto británicas como do estranxeiro. Foi elixido membro da Sociedade de Anticuarios de Londres en 1836. Pertenceu tamén á Real Sociedade de Anticuarios do Norte e ás Sociedades de Anticuarios de Francia, de Normandía, de Picardía, do Oeste, e de Morini. Así mesmo, durante moitos anos correu a cargo do artigo mensual da sección Antiquarian Notes na revista The Gentleman's Magazine.^[2][5]

Durante máis de cincuenta anos foi moi activo nas actividades da London Numismatic Society (antecedente da Royal Numismatic Society), da que foi un dos seus secretarios entre 1841 e 1844. Tamén foi autor de numerosas contribucións á súa revista Numismatic Chronicle.^[2]

Xunto co tamén anticuario Thomas Wright, fundou a Asociación Arqueolóxica Británica en 1843, e participou activamente no seu xornal. En 1855 foi membro fundador da Sociedade Arqueolóxica de Londres e Middlesex. Logo do seu retiro en Strood, asistiu con regularidade ás actividades da Sociedade Arqueolóxica de Kent e contribuíu con numerosos artigos en Archaeologia Cantiana.^[2]

Foi tamén membro honorífico das sociedades arqueolóxicas de Madrid, Wiesbaden, Mayence, Treyes, Chester, Cheshire e Lancashire, Suffolk, e Surrey, así como da Real Sociedade de Literatura, da Sociedade de Anticuarios de Escocia e da Société d'émulation d'Abbeville.^[2][5][6]

Derradeiros anos

Logo de diminuír a súa dedicación á actividade académica, adquiriu, para vivir a súa xubilación, unha pequena propiedade en Strood, Kent, con algún terreo de horta. Aí dedicouse fundamentalmente á pomoloxía e á obtención de viño. Sobre isto publicou un opúsculo en 1863 titulado On the Scarcity of Home-grown Fruits in Great Britain, previamente aparecido como artigo en Proceedings of the Historical Society of Lancashire and Cheshire, do que se distribuíron mil copias en Francia e en Alemaña.^[7] Roach Smith avogaba pola conveniencia da plantación do terreo baleiro nas beiras das vías do ferrocarril con maceiras ananas e outras clases de árbores froiteiras, e esta foi unha suxestión amplamente adoptada noutros países e dun xeito máis limitado en Inglaterra.^[2]

Roach Smith non casou. Logo dunha curta convalecencia de seis días, faleceu o 2 de agosto de 1890 e foi soterrado no cemiterio de Frindsbury.^[2]

Recoñecementos

• (1852): Membro honorífico da London Numismatic Society.^[2]
• (1883): Medalla da Royal Numismatic Society, de Londres.^[8]

Publicacións

Monografías

• (1848-1880). Collectanea antiqua: etchings and notices of ancient remains, illustrative habits, customs, and history of past ages. Vol. 1 (1848); Vol. 2 (1852); Vol. 3 (n/d); Vol. 4 (1857); Vol. 5 (1861); Vol. 6 (1868); Vol. 7 (1880). J. R. Smith, Londres.
• (1850). Roman History From Coins. Londres.
• (1850). The Antiquities of Richborough, Reculver, and Lymne, in Kent. J. R. Smith, Londres.
• (1854). Catalogue of the London Antiquities. Londres.
• (1855). Notes on some of the antiquities of France, made during a fortnight's excursion in the summer of 1865. Londres.
• (1858). Report on excavations made upon the site of the Roman castrum at Pevensey in Sussex, in 1852. Londres.
• (1859). Illustrations of Roman London. Londres.
• (1863). On the Scarcity of Home Grow Fruits in Great Britain, with Remedial Suggestions. Brakell, Liverpool.
• (1874). The Rural Life of Shakespeare, as illustrated by his works. Londres.
• (1871). A Catalogue of Anglo-Saxon and other Antiquities discovered at Faversham, in Kent, and bequeathed by William Gibbs of that town to the South Kensington Museum. Eyre & Spottiswoode, Londres. [2ª ed. en 1873]
• (1877). Remarks on Shakespeare: his birthplace, etc.: suggested by a visit to Stratford-on-Avon in the autumn of 1868. Bell and Sons, Londres.
• (1889). A Dictionary of Roman Coins, Republican and Imperial (con S. W. Stevenson e F. W. Madden). Bell and Sons, Londres.
• (1883-1991). Retrospections, Social and Archaeological. Vol 1 (1883); Vol. 2 (1886); Vol. 3 (1991). Bell and Sons, Londres.

Notas

1. "Charles Roach Smith". The British Museum.
2. Prideaux Courtney, W. (1898). Páxinas 26-27.
3. Véxase (1854) en "Publicacións".
4. Véxase (1859) en "Publicacións".
5. Véxase (1854) En "Publicacións". Portada e páxinas iii, iv e v.
6. Scott, S. (2017).
7. Véxase (1863) en "Publicacións".
8. "The Society’s Medal". Royal Numismatic Society.

Véxase tamén

Bibliografía

• Prideaux Courtney, W. (1898). "Smith, Charles Roach". En Dictionary of National Biography. 53. Londres: Smith, Elder & Co.
• Rhodes, M. (2004). "Smith, Charles Roach (1806-1890)". En Oxford Dictionary of National Biography. Oxford University Press.
• "Obituary: Charles Roach Smith., F.S.A". En Journal of the British Archaeological Association. Vol 46.1890. Nº 3.
• Scott, S. (2017). "'Gratefully dedicated to the subscribers': The archaeological publishing projects and achievements of Charles Roach Smith". En Internet Archaeology. 46.