Reginald Stuart Poole

Reginald Stuart Poole

Biografía
Nacemento	27 de xaneiro de 1832 Londres, Reino Unido
Morte	8 de febreiro de 1895 (63 anos) Londres. Inglaterra.
País de nacionalidade	Británica.
Q89547790	Estudos de numismática oriental.
Actividade
Campo de traballo	Orientalismo, arqueoloxía e numismática
Ocupación	arqueólogo, historiador da arte, orientalista, exiptólogo, numismático, conservador
Empregador	Museo Británico
Familia
Cónxuxe	Eliza Christina Forlonge (1861).
Premios
1892: Medalla da Royal Numismatic Society.
Descrito pola fonte	Dictionary of National Biography Dicionario Enciclopédico Brockhaus e Efron Encyclopædia Britannica

Reginald Stuart Poole, nado en Londres o 27 de xaneiro de 1832 e finado na mesma cidade o 8 de febreiro de 1895, foi un orientalista, arqueólogo e numismático inglés.

A súa vida profesional estivo vinculada ao Departamento de Moedas e Medallas do Museo Británico.^[1]

Traxectoria

Orixe familiar

Reginald Stuart Poole naceu en Londres, no seo dunha familia de eminentes orientalistas. Era fillo do reverendo Edward Poole, un destacado bibliófilo, e de Sophia Lane Poole, autora de Englishwoman in Egypt (1844). Os seus pais separáronse na súa infancia e a súa nai levou os fillos a Exipto para vivir co irmán desta, o orientalista Edward William Lane. Durante a residencia de sete anos no Cairo, entre 1842 e 1849, Reginald Stuart comezou a desenvolver a atracción polas antigüidades exipcias.^[2][3][4]

Á parte da súa nai e do seu tío, tamén o seu sobriño Stanley Lane-Poole foi un destacable orientalista e numismático, e outro dos seus tíos Richard James Lane, foi un coñecido litógrafo e gravador vitoriano.^[3]

Durante a súa estadía en Exipto realizou investigacións en coleccións privadas de antigüidades en Alexandría e no Cairo, e subiu dúas veces o Nilo co propósito de estudar os seus monumentos e, xa antes dos seus 17 anos, plasmou os resultados das súas investigacións nos seus artigos en The Litterary Gazette, publicados despois, en 1851, co título de Horæ Ægyptiacæ^[5].^[2][6]

Carreira académica

O 26 de febreiro de 1852 ingresou no Departamento de Antigüidades do Museo Británico e nunha reorganización posterior quedou adscrito ao Departamento de Moedas e Medallas. En xullo de 1866 foi nomeado conservador adxunto deste departamento e o 29 de outubro de 1870 foi ascendido a conservador titular, posto que ocupou ata o seu retiro.^[2][3][6]

Ademais do seu labor administrativo, a maior contribución de Poole a esta institución foi a creación e o desenvolvemento do proxecto British Museum Catalogues of Coins, unha serie editorial concibida co obxectivo era acadar a edición de series de catálogos das coleccións de moedas do Museo Británico, con criterios académicos. O proxecto continuou logo do retiro de Pool e mantense na actualidade. Dentro deste proxecto, o propio Reginald Stuart Poole foi o editor de 35 catálogos das series centradas na moeda grega, na moeda oriental e na moeda da India, e foi o autor de cinco deles.^[6][7]

Ademais do seu labor profesional no Museo, foi corresponsable do establecemento do Fondo de Exploración de Exipto en 1882 e da fundación da Sociedade de Medallistas en 1884^[8].^[2][3][6]

No ámbito docente, foi profesor titular de Arqueoloxía no University College London, onde sucedeu a Charles Newton, e tamén na Royal Academy.^[3][6]

En 1876 foi elixido membro correspondente da Académie des Inscriptions et Belles-Lettres, de París, e en 1880 recibiu un doutoramento honorífico (Legum Doctor) pola Universidade de Cambridge^[9].^[2][6]

Poole foi un firme defensor da obra de Champollion en Inglaterra. En resposta ás críticas que este tivera por parte de George Lewis en 1862, Poole defendeu o método Champollion destacando as súas calidades como método de interpretación dos xeroglíficos.^[10]

Vida persoal

O 6 de agosto de 1861 casou con Eliza Christina Forlonge, filla do político colonial no Canadá William Forlonge, con quen tivo catro fillos.^[2][6]

Reginald Stuart Poole retirouse en 1893 do seu posto no Museo Británico e en 1894 da súa cátedra universitaria, e faleceu en West Kensington, un distrito do Gran Londres, o 8 de febreiro de 1895.^[3][6]

Recoñecementos

• (1892): Medalla da Royal Numismatic Society, de Londres.^[11]

Publicacións

Algúns dos traballos máis significativos de Poole son os seus artigos para a novena edición da Encyclopædia Britannica, acerca de temas como Exipto, os xeroglíficos ou a numismática, e tamén as súas contribucións ao Smith's Dictionary of the Bible.^[3][6]

A seguir amósanse os traballos monográficos máis salientables publicados por Reginald Stuart Poole ao longo da súa carreira:^[12]

Escolma de monografías

Serie: British Museum Catalogues of Coins

• Catalogue of the Greek Coins in the British Museum, British Museum, Londres.
  • Vol. 1 (1873): Italy.
  • Vol. 2 (1876): Sicily (con P. Gardner e B. V. Head).
  • Vol. 7 (1883): The Ptolemies, Kings of Egypt.
  • Vol. 15 (1892): Alexandria and the nomes.
• (1887). The coins of the sháhs of Persia in the British Museum, British Museum, Londres.

Outras publicacións

• (1851). Horæ Aegyptiacæ Or, The Chronology of Ancient Egypt. Murray, Londres.
• (1878). A descriptive catalogue of Swiss coins in the South Kensington Museum (con C. H Townshend). Chapman & Hall, Londres.
• (1860). The Genesis of the Earth and of Man (ed.). Williams and Norgate, Londres.
• (1882). The Cities of Egypt. Smith, Elder & Co., Londres.
• (1882). Lectures on Art (con W. B. Richmond et al.). Macmillan, Londres.

Notas

1. "Reginald Stuart Poole". The British Museum.
2. Sorensen, L. (Ed.).
3. Hugh, C. (Ed.) (1911).
4. Lee, S. (Ed.) (1896). Páxinas 101-102.
5. Véxase (1851) en "Outras publicacións".
6. Lee, S. (Ed.) (1896). Páxina 102.
7. Hinton, M. (2011). "Numismatic Publications of the British Museum". En Barrie Cook (ed.). (2011). The British Museum and the Future of UK Numismatics: Proceedings of a conference held to mark the 150th anniversary of the British Museum's Department of Coins and Medals, 2011. British Museum Research Publication. 183. Páxinas 87-90. ISBN 978-086159-183-1
8. Attwood, P. (1983). "The Society of the Medallists: a nineteenth-century forerunner of the British Art Medal Society". En The Medal. 4. Páxinas 4-11.
9. "Poole, Reginald Stuart (PL883RS)". A Cambridge Alumni Database. University of Cambridge.
10. Poole, R. S. (1864). "On the method of interpreting Egyptian Hieroglyphics by Young and Champollion, with a vindication of its correctness from the strictures of Sir George Cornewall Lewis". En Archaeologia. 39 (2). Páxinas 471-482.
11. "The Society’s Medal". Royal Numismatic Society.
12. "Poole, Reginald Stuart 1832-1895". WorldCat Identities.

Véxase tamén

Wikimedia Commons ten máis contidos multimedia na categoría:  Reginald Stuart Poole

Bibliografía

• Caygill, M. L. (2004). "Poole, (Reginald) Stuart". En Oxford Dictionary of National Biography.
• Hugh, C. (Ed.) (1911). "Poole, Reginald Stuart". En Encyclopædia Britannica. 11ª ed.
• Lee, S. (Ed.) (1896). "Poole, Reginald Stuart". En Dictionary of National Biography. 46. Smith, Elder & Co., Londres. Páxinas 101-103.
• RIN (1895). "Necrologie: Reginald Stuart Poole". En Rivista italiana di numismatica. Società numismatica italiana. Páxinas 129-130.
• Sorensen, L. (Ed.). "Poole, Reginald Stuart". En Dictionary of Art Historians.

Ligazóns externas

• Placa de bronce na honra de R. S. Poole (1897)