Charlize Theron

	Charlize Theron
	Charlize Theron in 2018
Geboorte	7 Augustus 1975; Benoni, Transvaal, Suid-Afrika
Nasionaliteit	Suid-Afrika (1975–hede); Verenigde State (2007–hede)
Beroep(e)	Aktrise, vervaardiger, mode-model
Aktiewe jare	1995–hede
Webwerf	www.charlizeafricaoutreach.org
Toekennings	Golden Globe, Oscar
Internet-rolprentdatabasis-profiel

Charlize Theron (gebore op 7 Augustus 1975) is 'n Suid-Afrikaans-Amerikaanse aktrise, vervaardiger en modemodel asook Golden Globe/Oscar-wenner. Sy woon tans in Los Angeles. Theron, wat in 2007 naas Suid-Afrikaanse ook Amerikaanse burgerskap aanvaar het, is in 2019 onder die wêreld se hoogsbetaalde aktrises gereken.

Kinderjare

Charlize Theron is op 7 Augustus 1975 in Benoni in die destydse provinsie Transvaal as enigste kind van Gerda Jacoba Aletta (née Maritz)^[2] en Charles Jacobus Theron^[3] gebore. Sy het grootgeword op 'n hoewe naby Benoni,^[4]^[5] waar sy op Laerskool Putfontein was van 1982 tot 1988. Aan die Hoërskool Die Kruin vir Kuns, Musiek, Ballet en Drama in Parktown, Johannesburg, waar sy van 1989 tot 1993 onder meer ballet geneem het, was sy volgens haar oud-balletonderwyseres baie gewild onder die meisies. Hoewel Theron vlot Engels praat, is haar moedertaal Afrikaans.^[6]^[7]

Haar ma, Gerda, het in 1991 haar pa, Charles, met sy eie wapen doodgeskiet uit selfverdediging nadat dronkenskap en huishoudelike geweld 'n breekpunt in hul huis bereik het. (Charlize was toe 15 jaar oud.) Gerda is nie aangekla weens sy dood nie.^[8]

Hollywood

Die jong Charlize is Amerika toe om naam in Hollywood te maak en is uiteindelik deur 'n talentsoeker raakgesien. Haar eerste rol op die internasionale silwerdoek was in 1995 in Children of the Corn III.

Daarna het rolle gevolg in lokettreffers soos The Italian Job (2004) en The Life and Death of Peter Sellers (2004), Waking up in Reno, Trapped en Reindeer Games (2000), The Cider House Rules en The Astronaut's Wife (1999), Mighty Joe Young (1998) en The Devil's Advocate (1997). Haar lys van rolprente sluit verder in Two Days in the Valley en That Thing You Do (1996), Trial and Error (1997), Celebrity (1998), The Yards, Men of Honor en The Legend of Bagger Vance (2000), 15 Minutes, Sweet November en When I was a Girl (2001). Sy het ook in 1997 in die TV-treffer Hollywood Confidential opgetree.

Theron se ondervinding in dié uiteenlopende rolle het haar uiteindelik in staat gestel het om die veeleisende rol in die skrywer-regisseur Patty Jenkins se Monster los te slaan. Daar is aanvanklik verwag dat die rolprent nie groot aftrek by die algemene publiek sou kry nie, maar toe die toekennings begin inrol, is dié verwagting verkeerd bewys. Theron het ook in Head in the Clouds (2004), Aeon Flux Class Action (2005) en The Ice at the Bottom of the World (2006) gespeel.

Sy en die akteur Stuart Townsend was tussen 2001 en 2010 'n paartjie.^[9]

Belangrike prestasies

Charlize Theron het in 2004 op 28-jarige leeftyd die eerste Suid-Afrikaanse silwerdoekaktrise geword wat die gesogte Oscar-toekenning kon inpalm. Daarmee het sy die kroon gespan op 'n loopbaan wat reeds verskeie Hollywood-treffers en toekennings insluit.

Sy het die Oscar gewen vir haar rol in Monster, wat handel oor die lewe van Aileen Wuornos (sien inligtingkassie), 'n lesbiese reeksmoordenares wat op 9 Oktober 2002 in die VSA tereggestel is vir die moord op sewe manskliënte. Terwyl Wuornos se lewensverhaal van teistering wat geweld, verkragting, bloedskande, tienerswangerskap en prostitusie ingesluit het, geweldige eise aan Theron as aktrise gestel het, moes sy ook haar uiterlike radikaal aanpas (insluitende gewig aansit) om die verwaarloosde en hawelose prostituut se harde lewe te kon weergee.

Theron het naas die Oscar ook 'n Golden Globe-toekenning ontvang vir dié rol en is in 2004 saam met Sandino Moreno aangewys as die Beste Aktrise by die Berlynse Rolprentfees. (Moreno het die toekenning gedeel vir haar rol in Maria Full of Grace.) Theron het ook 'n Screen Actor’s Guild-toekenning en verskeie pryse wat deur kritici uitgeloof word, ingepalm. Boonop het sy in Monster nie net voor die kameras gewerk nie, maar ook as vervaardiger opgetree.

Ná haar oorwinning by die Oscar-aand het Theron ’n kort besoek aan haar geboorteland gebring, waar sy onderhoude met onder meer president Thabo Mbeki en oud-president Nelson Mandela gehad het, 'n liefdadigheidsbal bygewoon het en aangekondig het dat sy gaan help om 'n laboratorium in te rig waar DNS-toetse gedoen word om verkragtingsake vinniger af te handel. Sy het voorheen in 'n omstrede advertensieveldtog teen die verkragting van vroue in Suid-Afrika opgetree.

Privaatlewe

Theron woon in Los Angeles. Sy het lank 'n verhouding met die akteur en regisseur Stuart Townsend gehad. Townsend en Theron het mekaar op die stel van Trapped (2002) ontmoet. Hulle het saam in 'n paar films gespeel. Ook het Theron in Battle in Seattle gespeel, wat Townsend se debuut as regisseur gekenmerk het. Die twee is in Januarie 2010 uitmekaar. Theron het in die somer van 2011 vir etlike maande met die akteur Ryan Reynolds uitgegaan. Sy het 'n seun met die naam Jackson in 2012 aangeneem, wat op driejarige ouderdom aangedui het dat hy verkies om as 'n meisie (transgender) deur die lewe te gaan. Later het Theron 'n meisie aangeneem.

Verwysings

↑ Farber, Tanya. "Charlize defends her 'unique' American accent". IOL News (in Engels). Geargiveer vanaf die oorspronklike op 24 September 2015. I am a South African.
↑ (en) Karsten, Chris (2009). Charlize: Life's One Helluva Ride. Human & Rousseau. p. 18.
↑ (en) [1]
↑ "Charlize Theron Biography". Hello Magazine (in Engels). Geargiveer vanaf die oorspronklike op 2 Oktober 2018. Besoek op 9 Augustus 2012.
↑ "Benoni, East Rand". www.sa-venues.com (in Engels). Geargiveer vanaf die oorspronklike op 30 Januarie 2020. Besoek op 9 Augustus 2012.
↑ "Charlize Theron" (in Engels). AccessHollywood.com. Geargiveer vanaf die oorspronklike op 16 Januarie 2013. Besoek op 24 Oktober 2009.
↑ "Charlize Theron". People (in Engels). Geargiveer vanaf die oorspronklike op 10 Augustus 2016. Besoek op 24 Oktober 2009.
↑ (en) "Charlize Theron". BiographyChannel.co.uk. Geargiveer vanaf die oorspronklike op 8 Desember 2009. Besoek op 30 November 2011.
↑ Graham, Caroline (31 Januarie 2010). "Charlize Theron 'rings off' after secret split with Stuart Townsend". Daily Mail (in Engels). UK. Geargiveer vanaf die oorspronklike op 2 Oktober 2018. Besoek op 1 Februarie 2010.

Eksterne skakels

Wikiquote het aanhalings deur Charlize Theron.
Charlize Theron in die Internet-rolprentdatabasis
(en) Charlize Theron se webwerf

[Nationality-1] Farber, Tanya. "Charlize defends her 'unique' American accent". IOL News (in Engels). Geargiveer vanaf die oorspronklike op 24 September 2015. I am a South African.

[bookrefp18-2] (en) Karsten, Chris (2009). Charlize: Life's One Helluva Ride. Human & Rousseau. p. 18.

[3] (en) [1]

[4] "Charlize Theron Biography". Hello Magazine (in Engels). Geargiveer vanaf die oorspronklike op 2 Oktober 2018. Besoek op 9 Augustus 2012.

[5] "Benoni, East Rand". www.sa-venues.com (in Engels). Geargiveer vanaf die oorspronklike op 30 Januarie 2020. Besoek op 9 Augustus 2012.

[6] "Charlize Theron" (in Engels). AccessHollywood.com. Geargiveer vanaf die oorspronklike op 16 Januarie 2013. Besoek op 24 Oktober 2009.

[7] "Charlize Theron". People (in Engels). Geargiveer vanaf die oorspronklike op 10 Augustus 2016. Besoek op 24 Oktober 2009.

[biochannel-8] (en) "Charlize Theron". BiographyChannel.co.uk. Geargiveer vanaf die oorspronklike op 8 Desember 2009. Besoek op 30 November 2011.

[9] Graham, Caroline (31 Januarie 2010). "Charlize Theron 'rings off' after secret split with Stuart Townsend". Daily Mail (in Engels). UK. Geargiveer vanaf die oorspronklike op 2 Oktober 2018. Besoek op 1 Februarie 2010.

[1]

[2]

[3]

[4]

[5]

[6]

[7]

[8]

[9]