Samianigo

	Samianigo; Sabiñánigo
	Municipio d'Aragón
	; Plaza d'Espanya, Ayuntamiento y Ilesia de Cristo Rei.
Entidat; • País; • Provincia; • Comarca	Municipio; Aragón; Uesca; Alto Galligo
Partiu chudicial	Chaca
Superficie	586,8 km²
Población; • Total; • Densidat	; 9423 hab. (2013); 49,09 hab/km²
Altaria; • Meyana	; 780 m.
Distancia; • 52 km; • 18 km	; enta Uesca; enta Chaca
Alcalde	Jesús Timoteo Lasierra Asín
Codigo postal	22600
Chentilicio	samianiguense
Parroquial; • Diocesi; • Arcipestrau; • Parroquia	; Chaca; Samianigo; 5 parroquias
Ríos	Galligo, Tulivana, Guarga, Aurín, Alcanadre y Guatizalema
Coordenadas	42°31’ 6’’N 0°21’51’’U
	Samianigo Samianigo en Aragón
	Web oficial

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Samianigo (Sabiñánigo en castellano) ye un municipio aragonés d'a provincia de Uesca, situato a 780 metros d'altaria en Sarrablo, en a comarca de l'Alto Galligo, a 52 km de distancia de Uesca y tien una población de 9423 habitants.

A suya economía se basa en as industrias quimicas y en o turismo.

En o suyo termin municipal se troban buena parti d'as ilesias de Sarrablo, o Museu Ángel Orensanz y Artes de Sarrablo y o Museu de Debuixo d'o Castiello de Larrés.

Cheografía

Muga a lo norte con os municipios de Biescas y Yebra de Basa; a l'este con Fiscal y Boltanya; a lo sud con o municipio d'As Penyas de Riglos; a lo sudeste con a comarca d'o Semontano de Balbastro y a l'ueste con os municipios de Candarenas, Chaca y Villanuga.

Samianigo ye situato entre a val d'o río Aurín y a cuenca d'o curso meyo d'o río Galligo en a suya zona norte y entre Vallibasa y a Guarguera en a zona sud, es decir, abarca dende las sierras interiors d'o Pireneu dica las exteriors, pasando por a depresión meya, lo que fa que'n tienga una gran variedat d'ecosistemas y paisaches que se combinan con a rica arquitectura popular y relichiosa d'iste termin municipal.

Ye o mayor termin municipal de Uesca con os suyos 586,8 km² y o tercero d'Aragón dezaga d'os de Zaragoza y Exeya.

Clima

A suya temperatura anyal ye 10.86 °C, con una temperatura meya en chinero de 2.76 °C y en chulio de 20.34 °C.^[1]

Historia

A localidat de Samianigo fue fundata por os romanos, amán de l'actual ubicación, entre os ríos Galligo (d'as Galias) y Aurín (d'Aurum, por l'oro que se i trobaba) fa ya mas de 2000 anyos, en epoca d'Augusto.

Pareixe que o mas probable ye que o suyo nombre vienga d'o cheneral romano Calvisio Sabino,^[2] a qui acomandoron a a pacificación d'a zona dimpués d'a conquiesta romana. En un documento d'o sieglo II apareixe como Sabiniacum.

Mas tardi en 1035 Samianigo s'encorpora a lo reino d'Aragón y ye allora cuan apareixe documentato como Savignaneco. Mientres a Edat Meya estió patrimonio d'a Corona y no pas d'un sinyor feudal como atros lugars d'a redolada.

A la fin d'o sieglo XIX, Samianigo encara yera un chicot lugar con bellas 24 casas, cuals habitants viviban d'as suyas tierras y o suyo ganato. Cuan a carretera que puyaba ta o balneario de Pandicosa y ta Biescas s'amilloró en 1881 y prencipioron a construir casas arredol d'ista a lo suyo paso por o lugar de Samianigo. Asinas con a plegata d'a carretera y o ferrocarril en 1893, prencipió a creixer o lugar y se convertió en una ciudat adedicata a los servicios.

En 1918 prencipioron a instalar-sen en o lugar industrias quimicas y de l'aluminio aduyatas por a presencia d'o ferrocarril, as centrals electricas y a situación cheografica. Gracias a istas empresas a población d'o lugar puyó dende 100 habitants dica cuasi 10.000 en menos de 100 anyadas.

Demografía

A lo prencipio d'o sieglo XX Samianigo yera un chicot lugar que nomás teneba 280 habitants. Con a plegata d'o ferrocarril y d'as industrias instalatas en o lugar a población puyó muito debito a la plegata d'inmigrants venitos d'a resta d'a val y sobretot de difuera d'Aragón.

Evolución demografica

1362 f	1495 f	1842	1857	1860	1877	1887	1897	1900
-	-	-⁽¹⁾	242	242	264	231	247	280

1910	1920	1930	1940	1950	1960	1970	1981	1991
347	750	1.323	1.768	2.885	6.184⁽²⁾	8.608⁽³⁾	9.538⁽⁴⁾	9.056

1992	1994	1996	1997	1998	1999	2000	2001	2002
-	-	8.759	-	8.637	8.545	8.483	8.578	8.586

2003	2004	2005	2006	2007	2008	2009	2010	2011
8.797	8.855	9.023	9.264	9.673	10.112	10.378	10.383	10.345

2012	2013	2014	2015	2016	2017	2018	2019	2020
10.241	10.129	9.883	9.598	9.349	9.254	9.245	9.238	9.185

2021	2022	2023	2024	2025	2026	2027	2028	-
9.352	9.371	-	-	-	-	-	-	-

1717-1981: población de feito; 1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

⁽¹⁾ En iste censo se denominaba Saviñánigo y El Puente.

⁽²⁾ Entre o censo de 1960 y o anterior, crexe o termin d'o municipio porque incorpora a Sardas y recibe una parti de Cartirana.

⁽³⁾ Entre o censo de 1970 y o anterior, crexe o termin d'o municipio porque incorpora a Acumuer, Cartirana, Chesera, una parti de Ena, una parti de Guasa, una parte de Oliván, Orna de Galligo, Senegüé y Sorripas y Xabarrella.

⁽⁴⁾ Entre o censo de 1981 y o anterior, crexe o termin d'o municipio porque incorpora a una parti de A Guarta.

Economía

A economía de Samianigo se basa en os servicios, o turismo, as industrias metalurchica, quimica y farmaceutica y a enerchía.

A industria electroquimica "Aragonesas", establita en 1918 y a fabrica d'aluminio "Alcoa", establita en 1927 son encara hue dos d'os pilars d'a economia d'a capital sarrablesa.

Ya en os años 90 s'establió tamién a empresa farmaceutica "Bieffe Medital" en o municipio chunto a lo lugar de Sorripas, creyando tamién atra fuent de treballo ta la val.

Por atra parti tamién ye important o sector d'a enerchía por meyo d'a producción d'electricidat y gas natural.

Mientres os anyos 1975 y 1989 a empresa Inquinosa produció lindano contaminando la zona y deixando una balsa de residuos que contaminó o Río Galligo mientres a suya producción, a fabrica yera a nomás 50 metros d'o curso d'o río cuan la lechistación requeriba que estase a una distancia no menor d'1 km. En a fabrica tamién treballoron muitos vecins de Samianigo y a redolada que estioron exposaus a este producto cancericheno y mutachenico.^[3]

Cultura y Turismo

A casa d'o sieglo XIX (1810-1830), conoixita como Casa Batanero, ye a seu d'o Museu d'Artes de Sarrablo. Iste museu fue inagurato en 1979. A planta baixa reproduce as diferents cambras d'una casa pirenenca con toz os suyos trastes. En o segundo piso bi ha salas adedicatas a las fainas artesanals que se feban d'antes mas. En l'antigo granero s'ha instalato un espacio ludico adedicato a Pedrón, o famoso diaplet de Sarrablo.

En Samianigo se troba tamién "Pirenarium, o parque d'os Pireneus". Ye un parque tematico con maquetas d'o Pireneo y d'a resta d'Aragón en miniatura, y ye situato en os viellos cuartels de l'exercito.

Administración

Reparto de concellers

Eleccions municipals^[4]
Partiu	1979	1983	1987	1991	1995	1999	2003	2007	2011	2015	2019
Partido de los Socialistas de Aragón	4	6	6	7	7	8	7	5	7	6	7
Partido Popular	-	2	1	4	4	3	2	2	3	1	2
Partido Aragonés	-	5	5	2	1	1	2	3	5	4	2
Cambiar Sabiñánigo	-	-	-	-	-	-	-	-	-	2	1
Ciudadanos	-	-	-	-	-	-	-	-	-		1
Chunta Aragonesista	-	-	-	-	1	1	1	1	1	0	0
Izquierda Unida	-	-	1	-	-	-	1	2	1	-^[5]	-^[5]
Unión de Centro Democrático	6	-	-	-	-	-	-	-	-	-	-
Total		13	13	13	13	13	13	13	17	13	13

Alcaldes

Lista d'alcaldes
Lechislatura	Nombre	Partiu politico
1979–1983	Antonio Ferrer Piedrafita	Unión de Centro Democrático
1983–1987	Luis Giménez Buesa	Partido Aragonés
1987–1991	Antonio Calvo Lasierra	Partido de los Socialistas de Aragón
1991–1995	Antonio Calvo Lasierra	Partido de los Socialistas de Aragón
1995–1999	Carlos Iglesias Estaún	Partido de los Socialistas de Aragón
1999–2003	Carlos Iglesias Estaún	Partido de los Socialistas de Aragón
2003–2007	Carlos Iglesias Estaún	Partido de los Socialistas de Aragón
2007–2011	Jesús Lasierra Asín	Partido de los Socialistas de Aragón
2011–2015	Jesús Lasierra Asín	Partido de los Socialistas de Aragón
2015–2018	Jesús Lasierra Asín	Partido de los Socialistas de Aragón
2018–2019	Berta Fernández Pueyo	Partido de los Socialistas de Aragón
2019–2023	Berta Fernández Pueyo	Partido de los Socialistas de Aragón
2023–2027	Berta Fernández Pueyo ^[6]	Partido de los Socialistas de Aragón

Esporte

A ciudat ye mui ligata a lo esporte en cheneral y especialment a lo ciclismo, ye famosa por estar o escenario d'una d'as pruebas ciclistas amateurs mas importants d'o mundo, dita Quebrantahuesos, a cual sería una etapa Tour de Categoría Especial, por os puertos de montanya que se i pasan. A sobén etapas d'a Vuelta a Espanya, rematan, prencipian u pasan por a localidat, s'han feito incluso campionatos d'Espanya de "profesionals", pasando los millors ciclistas d'o mundo como Miguel Induráin entre atros.

O fútbol ye representato por o Agrupación Deportiva Sabiñánigo

Personalidaz naixitas de Samianigo

Categoría principal: Naixitos de Samianigo.

Ciudaz achirmanatas

Comunicacions

N-260.
N-330.

Se veiga tamién

Notas

↑ Samianigo-Lugar, Cristo Rei, o Pilar, Sant Chaime y Sant Chuan

Referencias

↑ (es) "Valores normales de precipitación y temperatura de la red climatológica (1961-1990). Serie monografías. Año 2000" (Instituto Nacional de Meteorología) en a pachina web de l'Instituto Aragonés de Estadística (IAEST).
↑ (es) Pascual Miguel Ballestín Toponimia Mayor de Aragón: ciudades, villas, lugares, aldeas, ríos, montañas y territorios, Gara d'Edizions, 2015, ISBN 978-84-8094-059-7, p.396
↑ La fábrica de lindano de Sabiñánigo contaminó las aguas del río Gállego durante 15 años.
↑ Archivo electoral
↑ ^5,0 ^5,1 Integrato en a coalición Cambiar Sabiñánigo
↑ (es) Consulta el listado de alcaldes que han sido proclamados en Aragón en Heraldo de Aragón

Vinclos externos

Se veigan as imáchens de Commons sobre Samianigo.
Concello de Samianigo
Datos alazetals
(an) O toponimo Samianigo
Amigos de Sarrablo
(an) Samianigo

Municipios d'a comarca de l'Alto Galligo
Biescas \| Candarenas \| Oz de Tena \| Pandicosa \| Samianigo \| Sallent de Galligo \| Yebra de Basa \| Yesero

Lugars d'o municipio de Samianigo

Lugars desapareixius d'o municipio de Samianigo
Aracastiello \| Bailín \| Belmonde \| Calveras \| Cerceles \| Centenero \| Civitatella \| Estaún \| Gronostué \| Huertalo \| Ipe \| Larbesa \| Larrué \| Luxués \| Muro \| Novalla \| Orzandué \| Perula \| Portiella \| Senés \| Sericata \| Ubieto \| Urbán \| Vilás

Datos: Q1552975
Multimedia: Sabiñánigo / Q1552975

[1] Samianigo-Lugar, Cristo Rei, o Pilar, Sant Chaime y Sant Chuan

[2] (es) "Valores normales de precipitación y temperatura de la red climatológica (1961-1990). Serie monografías. Año 2000" (Instituto Nacional de Meteorología) en a pachina web de l'Instituto Aragonés de Estadística (IAEST).

[3] (es) Pascual Miguel Ballestín Toponimia Mayor de Aragón: ciudades, villas, lugares, aldeas, ríos, montañas y territorios, Gara d'Edizions, 2015, ISBN 978-84-8094-059-7, p.396

[4] La fábrica de lindano de Sabiñánigo contaminó las aguas del río Gállego durante 15 años.

[5] Archivo electoral

[ReferenceA-6] 5,0 ^5,1 Integrato en a coalición Cambiar Sabiñánigo

[7] (es) Consulta el listado de alcaldes que han sido proclamados en Aragón en Heraldo de Aragón

[nota 1]

[1]

[2]

[3]

[4]

[5]

[6]